କିସ୍ ରେ ରାଜ୍ୟସ୍ତରୀୟ ଆଦିବାସୀ ସ୍ୱେଚ୍ଛାସେବୀ ସଶକ୍ତିକରଣ କାର୍ଯ୍ୟକ୍ରମ ଉଦ୍ଯାପିତ
ଭୁବନେଶ୍ୱର ୨୬/୦୪/୨୦୨୬ : ଓଡ଼ିଶା ସରକାରଙ୍କ ଉଚ୍ଚ ଶିକ୍ଷା ବିଭାଗର ଏନ୍. ଏସ୍. ଏସ୍. ସେଲ୍ ସହାୟତାରେ କଳିଙ୍ଗ ଇନଷ୍ଟିଚ୍ୟୁଟ୍ ଅଫ୍ ସୋସିଆଲ୍ ସାଇନ୍ସେସ୍ (କିସ୍) ର ଜାତୀୟ ସେବା ଯୋଜନା ବ୍ୟୁରୋ ଦ୍ୱାରା ଆୟୋଜିତ ତିନି ଦିନିଆ ରାଜ୍ୟସ୍ତରୀୟ ଜନଜାତି ସ୍ୱେଚ୍ଛାସେବୀ ସଶକ୍ତିକରଣ କାର୍ଯ୍ୟକ୍ରମ ଆଜି ରାଜ୍ୟର ୧୬ଟି ବିଶ୍ୱବିଦ୍ୟାଳୟର ୨୦୦ରୁ ଅଧିକ ଏନ୍. ଏସ୍. ଏସ୍. ସ୍ୱେଚ୍ଛାସେବୀଙ୍କ ସକ୍ରିୟ ଅଂଶଗ୍ରହଣ ସହିତ ସଫଳତାର ସହ ଉଦଯାପିତ ହୋଇଛି। ଉଦଯାପନୀ ଅଧିବେଶନରେ ଅଂଶଗ୍ରହଣ କରି, ପତ୍ର ସୂଚନା କାର୍ଯ୍ୟାଳୟ(ପିଆଇବି) ଏବଂ କେନ୍ଦ୍ରୀୟ ସଞ୍ଚାର ବ୍ୟୁରୋ (ସିବିସି)ର ଅତିରିକ୍ତ ମହାନିର୍ଦ୍ଦେଶକ ଶ୍ରୀ ଅଖିଳ କୁମାର ମିଶ୍ର ନୀତି ନିର୍ଦ୍ଧାରଣରେ ପ୍ରଭାବୀ ଯୋଗାଯୋଗର ଗୁରୁତ୍ୱ ଏବଂ ତୃଣମୂଳ ସ୍ତରରେ ସରକାରଙ୍କ କଲ୍ୟାଣମୂଳକ ପଦକ୍ଷେପଗୁଡ଼ିକର ପ୍ରସାର ସୁନିଶ୍ଚିତ କରିବା ଉପରେ ଆଲୋକପାତ କରିଥିଲେ। ଏନ୍.ଏସ୍.ଏସ୍. ସ୍ୱେଚ୍ଛାସେବୀମାନଙ୍କୁ ସମ୍ବୋଧିତ କରି ଶ୍ରୀ ମିଶ୍ର କହିଥିଲେ ଯେ ଲୋକମାନଙ୍କୁ ପ୍ରଭାବିତ କରିବା, ସନ୍ଦେହ ଦୂର କରିବା, ସମ୍ପର୍କକୁ ସୁଦୃଢ଼ କରିବା, ବିଶ୍ୱାସ ସୃଷ୍ଟି କରିବା ଏବଂ ସମାଜର ସାମଗ୍ରିକ ପ୍ରଗତି ପାଇଁ ମାର୍ଗ ପ୍ରଶସ୍ତ କରିବା ଲାଗି ପ୍ରଭାବଶାଳୀ ଯୋଗାଯୋଗ ଅତ୍ୟନ୍ତ ଗୁରୁତ୍ୱପୂର୍ଣ୍ଣ।
ସେ ଗୁରୁତ୍ୱାରୋପ କରିଥିଲେ ଯେ ଏକ ସମାବେଶୀ ଏବଂ ସହଭାଗୀ ସାମାଜିକ ପରିବେଶ ନିର୍ମାଣରେ ଯୋଗାଯୋଗ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥାଏ। ଅଂଶଗ୍ରହଣକାରୀଙ୍କ ପ୍ରଶ୍ନର ଉତ୍ତର ଦେଇ ଶ୍ରୀ ମିଶ୍ର ଗୁରୁତ୍ୱାରୋପ କରିଥିଲେ ଯେ ଗଣମାଧ୍ୟମ ପହଞ୍ଚି ପାରୁନଥିବା ଅଞ୍ଚଳରେ ବସବାସ କରୁଥିବା ଆଦିବାସୀ ଲୋକଙ୍କ ଯୋଗାଯୋଗ ଦକ୍ଷତାକୁ ସୁଦୃଢ଼ କରିବା ଉପରେ ବିଶେଷ ଧ୍ୟାନ ଦିଆଯିବା ଉଚିତ, ଯାହାଦ୍ୱାରା ସେମାନେ ବିଭିନ୍ନ ସରକାରୀ ଯୋଜନାର ଲାଭ ଭଲ ଭାବେ ପାଇପାରିବେ। ସେ କହିଥିଲେ ଯେ ସମାଜର ପ୍ରତ୍ୟେକ ବର୍ଗ, ବିଶେଷ କରି ଆଦିବାସୀ ଏବଂ ଅବହେଳିତ ଲୋକଙ୍କ ନିକଟରେ ସଚେତନତା ଏବଂ ଯୋଗାଯୋଗ ପହଞ୍ଚିବା ଆବଶ୍ୟକ। ସେ ଆହୁରି ମଧ୍ୟ ରେଖାଙ୍କିତ କରିଥିଲେ ଯେ ଭୟ ଏବଂ ନୀରବତା ପ୍ରଭାବଶାଳୀ ଯୋଗାଯୋଗରେ ପ୍ରମୁଖ ପ୍ରତିବନ୍ଧକ ଭାବରେ କାର୍ଯ୍ୟ କରେ ଏବଂ ଅଂଶଗ୍ରହଣକାରୀମାନଙ୍କୁ ନୀରବତା ଭାଙ୍ଗିବାକୁ ଏବଂ ଖୋଲାଖୋଲି ଭାବରେ ସେମାନଙ୍କର ଚିନ୍ତା ବ୍ୟକ୍ତ କରିବାକୁ ଅନୁରୋଧ କରିଥିଲେ। ଏହି ଅବସରରେ ଏନ୍. ଏସ୍. ଏସ୍. କାର୍ଯ୍ୟକ୍ରମ ଅଧିକାରୀ ଡ. ମୈତ୍ରୀ ପାଢ଼ୀ, ନୃତତ୍ତ୍ୱ ବିଭାଗର ସହକାରୀ ପ୍ରଫେସର ତଥା ପୂର୍ବତନ ଏନ୍. ଏସ୍. ଏସ୍. ସଂଯୋଜକ ଡ. ମନୋରଞ୍ଜନ ମହାପାତ୍ର, ବାଣିଜ୍ୟ ବିଭାଗର ସହକାରୀ ପ୍ରଫେସର ଡ. ସି. ଏଚ୍. ସୁଦିପ୍ତ କିଶୋର ନନ୍ଦ, କିସ୍ ର ଗୃହ ବିଜ୍ଞାନ ବିଭାଗର ଅଧ୍ୟାପକ ଶ୍ରୀମତୀ ମାନସୀ ଚନ୍ଦ୍ର ନାୟକ, ଏନ୍. ଏସ୍. ଏସ୍. କାର୍ଯ୍ୟକ୍ରମ ଅଧିକାରୀ, ଡ. ସାଲୋମାନ ବେହରା, ଶ୍ରୀ ରୁଦ୍ରଶ୍ରୀ ଆର୍. ସାସ୍ମଲ ଏବଂ କିସ୍ର ଏନ୍. ଏସ୍. ଏସ୍. କାର୍ଯ୍ୟକ୍ରମ ସଂଯୋଜକ ଡ. ପରୀକ୍ଷିତ ଖଟୁଆ ମଧ୍ୟ ଉପସ୍ଥିତ ଥିଲେ।