ହେ ମାୟାଧର ଆଉ ମାୟା ନ କର

         ହେ ମାୟାଧର ଆଉ ମାୟା ନ କର
           ( ରାଗ — କଳହଂହ କେଦାର )

  🖊️କବିରତ୍ନ ନୂତନ କୁମାର ବେହେରା

ହେ ମାୟାଧର ଆଉ’ ମୟା ନ କର’
   ମିଛ ମାୟା ମୋହରେ ‘ ବୁଡ଼େ ସଂସାର’ ଯେ,
କାଚକୁ ଭାବି ମଣି’ ଭବେ ମଣିଷ’
      ହରାଇ ବସେ ତାର’ ଆତ୍ମବିଶ୍ଵାସ ଯେ/୧/

ମନରେ ଭରି ରଙ୍ଗ ଦେଖାଏ ଢ଼ଙ୍ଗ
      ସେ କ୍ରମରେ ଜୀବନେ ନାଚେ ତରଙ୍ଗ ଯେ,
ବୁଝିବା ଆଗରୁ ତ ବୁଡ଼ାଏ ଢ଼େଉ
   ଖୋଜିଲେ ମିଳୁନାହିଁ ଉପାୟ ଆଉ ଯେ/୨/

ତୁମେ ତ ମାୟାଧର ଜୀବ ଜୀବନ
         କିମ୍ପାଇଁ କରାଉଛ ଭୁବନେ ଆନ ଯେ ?
ନୟନେ ଭରି ଦିଅ ଅମା ଅନ୍ଧାର
        ପଥ ଦିଶଇ ନାହିଁ ହୁଏ ଅଧୀର ଯେ/୩/

ଯିଏ ହେଉଛି ଏଠି ମାୟାରେ ବନ୍ଧା
           ବିଷୟା ବିଷକୁ ସେ ଭାବୁଛି ସୁଧା ଯେ,
ମିଛକୁ ସତ କହି କରଇ ଖେଳା
     ପରିମାଣେ ତାହାର ବୁଡ଼ଇ ଭେଳା ଯେ/୪/

ତୁମେ ହିଁ ସତ୍ୟ ନିତ୍ୟ ଚିର ଶାଶ୍ଵତ
       ଜୀବଙ୍କୁ ଲକ୍ଷ୍ୟ ପଥେ କର ପ୍ରେରିତ ଯେ,
ମୋହେ ମୋହିତ ହୋଇ କରେ ଅନର୍ଥ
      ଜୀବନକୁ ତାହାର କରଇ ବ୍ୟର୍ଥ ଯେ/୫/

ତୁମେ ତ ଅନ୍ତର୍ଯ୍ୟାମୀ ଜଗତେ ସ୍ଵାମୀ
ଜଣାଉଛି ତୁମକୁ ନମ୍ରେ ପ୍ରଣମି ଯେ,
ସୃଷ୍ଟିର କର୍ତ୍ତା ତୁମେ ରଖ ସୃଷ୍ଟିକୁ
ମେଲି ଦିଅ ତୁମର ମହାବାହୁକୁ/୬/

ହେ ମାୟାଧର ମାୟା ଘୁଞ୍ଚାଇ ଦିଅ
         ସ୍ଵାଭାବିକେ ବହୁ ଏ ଜୀବନ ସୁଅ ଯେ,
ସଦୟେ ହୋଇ ସାହା ଦିଅ ଶରଣ,
  ଦୂର ହେଉ ଜୀବର ଯେତେ କଷଣ ଯେ/୭/

  ପ୍ରତିଷ୍ଠାତା ଓ ମୁଖ୍ୟସମ୍ପାଦକ,
‘ ନବସୃଜନ ‘ ଇ-ପତ୍ରିକା,
କୋହି,ବାରିପଦା,ମୟୂରଭଞ୍ଜ।