ସତ ପାଖେ ମିଛ ବନ୍ଧା ପଡିଛି
ଶୀର୍ଷକ _ସତ ପାଖେ ମିଛ ବନ୍ଧା ପଡିଛି
ରୀତାରାଣୀ ଦାଶ
ବାଲେଶ୍ୱର
ସତ ପାଖେ ଆଜି ମିଛ ଅଟେ ବନ୍ଧା
ଜୀବନ ସତ୍ୟକୁ ଖୋଜିବା ନିଜେ
ମିଛ ବନ୍ଧନକୁ ଭାଙ୍ଗିବା ପଣରେ
ସତ୍ୟ ଆଲୋକିତ ହେବ ସହଜେ |
ଜୀବନର ଏଇ ମିଛରେ ମିଛ ଦୋଛକିରେ
ଅଭିନୟ କେବେ କରିବା ନାହିଁ
ଗୋଟିଏ ମିଛକୁ ଢାଙ୍କିବାକୁ ଯାଇ
ସହସ୍ର ସତକୁ ବାନ୍ଧିବା ନାହିଁ |
ଶବଦର ଜାଲ ଜଟିଳ କୁଟିଳ
ବୁଣାଥିଲେ ସିନା ମିଥ୍ୟାର ପାଇଁ
ମିଥ୍ୟା ଲୁଚିବାର କପଡ଼ାର ଭିତରୁ
ଧରା ପଡ଼ିଯାଏ ସତ୍ୟ କୁ ନେଇ |
ଛଳନା କପଟ ଭଦ୍ର ମୁଖାଧାରୀ
ଚାଟୁକାର ଛନ୍ତି ପରଦା ପଛେ
ସର୍ବ ଦ୍ରଷ୍ଟା ଶ୍ରୋତା ଅଭିଜ୍ଞ ଗ୍ରହୀତା
ଅଭିନୟେ ବ୍ୟସ୍ତ ବାହାନା ବାଜେ |
ଦୁର୍ବଳ ଖିଅଟେ ଛିଡି ଯାଇପାରେ
କିମ୍ବା କେବେ ଯୋଡି ହୋଇ ତ ପାରେ
ପସନ୍ଦର ଯୋଗ୍ୟ କରିବାକୁ ହେଲେ
ତେଜିବାକୁ ହେବ ମିଥ୍ୟା ଅଚିରେ |
ସଚ୍ଚୋଟ ପଣିଆ ଓଜନ ଗମ୍ଭୀର
କରି ଦେଇପାରେ ମୁକ୍ତ ବିଧାନ
ଛଳନାର ପେଡି ତ୍ୟାଗୀଲେ ଜୀବନୁ
ଆଦରିଲେ ଶ୍ରଦ୍ଧା ପ୍ରେମ ଓ ସ୍ନେହ |
ସତ୍ୟପଥ ଯାତ୍ରୀ ଅଶେଷ କଷଣେ
ଶିକାର ହୁଅନ୍ତି ବିଚ ବଜାରେ
କଳାକୋଟ ପିନ୍ଧି କଳା ଚଷମାରେ
ସତ ହୁଏ ମିଥ୍ୟା ପ୍ରଣାମ ଦ୍ୱାରେ |
ଯୁଗ ଯୁଗ ପାଇଁ ପରିବର୍ତ୍ତନର
ପରିପୂର୍ଣ୍ଣ ଆଶା ଭରସା ନାହିଁ
ହିଂସା ପ୍ରଣୋଦିତ ତରବାରୀ ଯେବେ
ରଖିବେ ହସ୍ତରେ ଧନୀ ବୋଲାଇ |