ଶ୍ରୀମନ୍ଦିର ଦର୍ଶନ

ଶ୍ରୀମନ୍ଦିର ଦର୍ଶନ: ପୁରୀ ଓ ପଞ୍ଚକୋଷୀ ବାସୀଙ୍କ ସାମ୍ବିଧାନିକ ଅଧିକାର ଓ ସ୍ୱାଭିମାନ

“କାଳିଆ ଦର୍ଶନ ବିନା ଯାହାର ଦିନ ଆରମ୍ଭ ହୁଏନାହିଁ, ସେହି ପୁରୀ ଓ ପଞ୍ଚକୋଷୀ ବାସିନ୍ଦାଙ୍କ ଶ୍ରଦ୍ଧାକୁ ଘଣ୍ଟା ଘଣ୍ଟା ଧରି ଧାଡ଼ିରେ ଛିଡ଼ା କରି ରଖିବା କେତେଦୂର ଯୁକ୍ତିଯୁକ୍ତ?”
ଶ୍ରୀକ୍ଷେତ୍ର ପୁରୀ କୋଟି କୋଟି ଶ୍ରଦ୍ଧାଳୁଙ୍କ ଆସ୍ଥାର କେନ୍ଦ୍ରବିନ୍ଦୁ। କିନ୍ତୁ ପୁରୀ ସହର ଏବଂ ପଞ୍ଚକୋଷୀ ଅଞ୍ଚଳରେ ବାସ କରୁଥିବା ବାସିନ୍ଦାଙ୍କ ପାଇଁ ମହାପ୍ରଭୁ ଜଗନ୍ନାଥ ହେଉଛନ୍ତି ସେମାନଙ୍କ ଜୀବନର ଆଧାର। ପୁରୀ ଓ ପଞ୍ଚକୋଷୀ ବାସୀଙ୍କ ଦୈନନ୍ଦିନ ଜୀବନଚର୍ଯ୍ୟା ଶ୍ରୀମନ୍ଦିରର ନୀତିକାନ୍ତି ସହ ଓତଃପ୍ରୋତ ଭାବେ ଜଡ଼ିତ। ଅନେକ ଶ୍ରଦ୍ଧାଳୁ ପ୍ରତିଦିନ ପ୍ରଭୁଙ୍କୁ ଦର୍ଶନ ନକରି ଜଳସ୍ପର୍ଶ କରନ୍ତି ନାହିଁ କିମ୍ବା ମହାପ୍ରସାଦ ଟିକେ ନପାଇଲେ ସେମାନଙ୍କର ଦୈନିକ ବ୍ରତ ପୂର୍ଣ୍ଣ ହୁଏନାହିଁ।
ସାମ୍ବିଧାନିକ ଅଧିକାର ଓ ସ୍ଥାନୀୟ ଶ୍ରଦ୍ଧା:
ଭାରତୀୟ ସମ୍ବିଧାନର ଅନୁଚ୍ଛେଦ ୨୫ ପ୍ରତ୍ୟେକ ନାଗରିକଙ୍କୁ ନିଜର ଧର୍ମ ଏବଂ ବିଶ୍ୱାସକୁ ମାନିବା ଓ ଅବାଧରେ ପାଳନ କରିବାର ମୌଳିକ ଅଧିକାର ପ୍ରଦାନ କରିଛି। ପୁରୀ ଓ ପଞ୍ଚକୋଷୀ ବାସିନ୍ଦାଙ୍କ ପାଇଁ ଶ୍ରୀମନ୍ଦିର ଦର୍ଶନ ସେମାନଙ୍କର ଶତାବ୍ଦୀ ଶତାବ୍ଦୀର ପରମ୍ପରା ଓ ଧାର୍ମିକ ସ୍ୱାଧୀନତା। ମାତ୍ର ବର୍ତ୍ତମାନର ଅସମ୍ଭାଳ ଭିଡ଼ ଏବଂ ନୂତନ ଶୃଙ୍ଖଳା ବ୍ୟବସ୍ଥା ମଧ୍ୟରେ ସ୍ଥାନୀୟ ଲୋକଙ୍କୁ ପର୍ଯ୍ୟଟକଙ୍କ ଭଳି ଘଣ୍ଟା ଘଣ୍ଟା ଧରି ଧାଡ଼ିରେ ଛିଡ଼ା ହେବାକୁ ପଡ଼ିବା ସେମାନଙ୍କର ସେହି ସାମ୍ବିଧାନିକ ଅଧିକାର ଓ ଆଧ୍ୟାତ୍ମିକ ସ୍ୱାଭିମାନ ଉପରେ ଏକ ପ୍ରକାର ଆହ୍ୱାନ ଭଳି ପ୍ରତିୀତ ହେଉଛି।
ସାମାଜିକ ସଂଗଠନଗୁଡ଼ିକର ଦାବି:
ପୁରୀର ବିଭିନ୍ନ ସାମାଜିକ ସଂଗଠନ ଏହି ପ୍ରସଙ୍ଗରେ ଗଭୀର ଉଦବେଗ ପ୍ରକାଶ କରିଛନ୍ତି। ସଂଗଠନଗୁଡ଼ିକର ଯୁକ୍ତି ହେଉଛି ଯେ, ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ଥାନୀୟ ଲୋକଙ୍କୁ ଚିହ୍ନଟ କରି ସେମାନଙ୍କ ପାଇଁ ପରିଚୟ ପତ୍ର ଆଧାରରେ ‘ସ୍ୱତନ୍ତ୍ର ପ୍ରବେଶ ପଥ’ କିମ୍ବା ‘ସ୍ୱତନ୍ତ୍ର ସମୟ’ ନିର୍ଦ୍ଧାରଣ କରାଯାଉ। ଏହା ଦ୍ୱାରା ବୟସ୍କ ବ୍ୟକ୍ତି, ମହିଳା ଓ ନିତିଦିନିଆ ଶ୍ରଦ୍ଧାଳୁମାନେ ନିଜର ଧର୍ମୀୟ କାର୍ଯ୍ୟ ସମାପନ କରି ସହଜରେ ନିଜ ନିଜ କାମରେ ଯୋଗ ଦେଇପାରନ୍ତେ।

ବିକାଶ ଅପରିହାର୍ଯ୍ୟ, କିନ୍ତୁ ବିକାଶର ଧାରା ମଧ୍ୟରେ ସ୍ଥାନୀୟ ଲୋକଙ୍କ ଆବେଗ ଓ ସେମାନଙ୍କର ଧାର୍ମିକ ଅଧିକାରକୁ ଅଣଦେଖା କରାଯାଇ ନପାରେ। ସାମାଜିକ ସଂଗଠନଗୁଡ଼ିକ ପକ୍ଷରୁ ଉଠାଯାଇଥିବା ଏହି ଦାବି ସମ୍ପୂର୍ଣ୍ଣ ସାମ୍ବିଧାନିକ ଓ ନ୍ୟାୟ ସମ୍ମତ। ପ୍ରଶାସନ ଏହି ସମ୍ବେଦନଶୀଳ ପ୍ରସଙ୍ଗକୁ ତୁରନ୍ତ ବିଚାର କରି ଏକ ସନ୍ତୁଳିତ ସମାଧାନର ପନ୍ଥା ବାହାର କରିବା ଆବଶ୍ୟକ।
ମହାପ୍ରଭୁ ଜଗନ୍ନାଥ ସମସ୍ତଙ୍କର, କିନ୍ତୁ ଯେଉଁମାନେ ଶ୍ରୀକ୍ଷେତ୍ରର ମାଟିକୁ ନିଜର ବୋଲି ମାନି ମହାପ୍ରଭୁଙ୍କ ସାନ୍ନିଧ୍ୟରେ ଜୀବନ କାଟୁଛନ୍ତି, ସେମାନଙ୍କୁ ଦର୍ଶନରୁ ବଞ୍ଚିତ କରିବା କିମ୍ବା ଅଯଥା କଷ୍ଟ ଦେବା ଉଚିତ ନୁହେଁ। ପୁରୀ ଓ ପଞ୍ଚକୋଷୀ ବାସୀଙ୍କୁ ଶ୍ରୀମନ୍ଦିରରେ ସ୍ୱତନ୍ତ୍ର ମର୍ଯ୍ୟାଦା ଓ ସୁବିଧା ମିଳିବା ସେମାନଙ୍କର ସାମ୍ବିଧାନିକ ଓ ନ୍ୟାଯ୍ୟ ଦାବି।
ଉମାବଲ୍ଲଭ ରଥ
ପୂର୍ବତନ ବିଧାୟକ,ପୁରୀ
ବି:ଦ୍ର: ଆପଣଙ୍କ ପ୍ରତିଷ୍ଠିତ ଦୈନିକ ସମ୍ବାଦପତ୍ର ରେ ପ୍ରକାଶନ ନିମନ୍ତେ ଅନୁରୋଧ କରୁଛି।
ଉମାବଲ୍ଲଭ ରଥ