ହଲିଉଡ୍ ପରଦା ପଛରେ ଓଡ଼ିଆ ପୁଅର କମାଲ
କୋଣାର୍କ, ହଲିଉଡ୍ ରଙ୍ଗୀନ ପରଦା ପଛରେ କମାଲ କରୁଛନ୍ତି ଓଡ଼ିଆ ପୁଅ। କୋଣାର୍କ ନିକଟସ୍ଥ ପୁରୀ ଜିଲ୍ଲା ଗୋପ ବ୍ଲକ ଅନ୍ତର୍ଗତ ମହଲପଡ଼ା ପଞ୍ଚାୟତ ଭୋଗପଡ଼ା ଗ୍ରାମର ପ୍ରଦୀପ୍ତ ବିଶ୍ଵାଳ ଓ ମମତା ବିଶ୍ଵାଳଙ୍କ ପୁତ୍ର ହେଉଛନ୍ତି ଦୀପକ ବିଶ୍ଵାଳ(ମୁନା) । ସେ ଭୁବନେଶ୍ଵରରେ ଆନିମେସନ୍ ଆଉ ମଲ୍ଟିମିଡ଼ିଆରେ ଡିପ୍ଲୋମା ଶେଷକରି ମହାରାଷ୍ଟ୍ରର ପୁନେର ଚିନ୍ଟିୱାର୍ଡରେ ଏସ୍ଏମ୍ ଗୋଳି ଏଫ୍ଏକ୍ସ କମ୍ପାନୀରେ କାର୍ଯ୍ୟରତ ରହି ସେ ଭିଏଫ୍ଏକ୍ସ କଳାକାର ଭାବରେ ପ୍ରଥମେ ବଲିଉଡ଼ ସିନେମାରୁ ନିଜର କ୍ୟାରିୟର ଆରମ୍ଭ କରିଥିବା ଜଣାପଡ଼ିଛି। ବଲିଉଡ଼ ସିମେମା ରେସ-୩, ଜିରୋ, ସର୍ଦାର, ମଣିକର୍ଣ୍ଣିକା, ଆଦିପୁରୁଷ ଇତ୍ୟାଦି ଅନେକ ହିଟ ଫିଲ୍ମରେ ସଫଳତାହ ସହ କାର୍ଯ୍ୟ କରିବା ସହିତ ଟଲିଉଡ଼ର ସୁପରହିଟ୍ ସିନେମା ‘ସୂର୍ଯ୍ୟ ଦ ସୋଲଜର’, ପୁଷ୍ପା-୨, ଅଲ ବୈକୁଣ୍ଡା ପେରୁମାଲ୍ ପରି ସିନେମାରେ କାର୍ଯ୍ୟ କରି ବହୁ ସଫଳତା ହାସଲ କରିଛନ୍ତି। ଏବେ ନେଟ୍ପ୍ଟିକ୍ସ ପ୍ରସାରିତ ହଲିଉଡ଼ ସିନେମା ‘ଏକ୍ସଟେରିଟୋରିଆଲ୍’ରେ ଭିଏଫ୍ଏକ୍ସ ଆର୍ଟିଷ୍ଟ୍ ଭାବରେ କାମ ଆରମ୍ଭକରିଛନ୍ତି । ଯାହାକି ଗତ ଏପ୍ରିଲ ୩୦ରେ ତାଙ୍କର ଏହି ସିନେମା ରିଲିଜ୍ ହୋଇସାରିଛି। ଖୁବ ଅଳ୍ପ ବୟସରେ ଦେଶ ବିଦେଶର ଅନେକ ସିନେମା ପରଦା ପଛର ନାୟକ ସାଜି ସେ ବହୁ ସଫଳତା ପାଇପାରିଛନ୍ତି । ରଙ୍ଗୀନ ପରଦାର ସେ ଜଣେ ସଫଳ ଭିଏସ୍ଏକ୍ସ କଳାକାର ଭାବେ ଗୋଟେ ପରେ ଗୋଟେ ସଫଳତାର ସିଡ଼ି ଚଢ଼ି ଓଡ଼ିଆ ଜାତିର ଟେକ ରଖୁଥିବା ନେଇ ସାଧାରଣରେ ଖୁବ ପ୍ରଶଂସା କରାଯାଇଛି । ହଲିଉଡ଼ ଓ ବଲିଉଡ ସିନେମାର ଦୃଶ୍ୟ ଚିତ୍ରଗୁଡିକର ଉପଯୁକ୍ତ ସମ୍ପାଦନା କରି ଜାତୀୟ ଓ ଅନ୍ତର୍ଜାତୀୟ ସିନେ ଜଗତରେ ଦୀପକ ବହୁ ପ୍ରଶଂସା ଅର୍ଜନ କରିଛନ୍ତି। ଦୀପକ ତାଙ୍କର ସଫଳତାର ସମସ୍ତ ଶ୍ରେୟ ତାଙ୍କ ଜେଜେ ସ୍ଵର୍ଗତ ଭିକାରି ବିଶ୍ବାଳଙ୍କୁ ଦେଇଛନ୍ତି। ଦୀପକଙ୍କ ସଫଳତାକୁ ନେଇ ଗୋପ ବ୍ଲକ ମହଲପଡ଼ା ପଞ୍ଚାୟତବାସୀ ଖୁସିହେବା ସହ ପ୍ରଶଂସା କରିଛନ୍ତି।