ପାଞ୍ଚାଳୀର ଗାଥା

ପାଞ୍ଚାଳୀର ଗାଥା
ଡ. ପ୍ରେମାନନ୍ଦ ବେହେରା

ଅଗ୍ନିକୁଣ୍ଡର ଦୀପ୍ତ ଶିଖାରୁ ଉଦିତା
ଦ୍ରୌପଦୀ….ପାଞ୍ଚାଳୀ….
ପାଞ୍ଚାଳର ରାଜକନ୍ୟା
ଗୌରବର ଗାଥା
ଜନ୍ମରେ ଥିଲା ଅଗ୍ନିର ଆଭା
ନୟନେ ନୀଳ ଧୈର୍ଯ୍ୟ
କଣ୍ଠେ ଅନ୍ୟାୟ ବିରୋଧୀ ଶପଥ ।।

ସ୍ୱୟଂବରର ସୁବର୍ଣ୍ଣ ସଭାରେ
ଗୁଞ୍ଜିଉଠିଲା ଧନୁର୍ବାଣର ଶବ୍ଦ
ବୀରତାର ପରୀକ୍ଷା ମଝିରେ
ତାଙ୍କ ଭାଗ୍ୟ ଲେଖିଦେଲା ସମୟ
ପାଞ୍ଚ ବୀରଙ୍କ ସହ
ଯୋଡ଼ିହେଲା ଅଦ୍ଭୁତ ବନ୍ଧନ
ଧର୍ମ, ଶୌର୍ଯ୍ୟ ଓ ତ୍ୟାଗର ସଂଗମ ।।

କିନ୍ତୁ ରାଜସଭାର ଅନ୍ଧକାରେ
ଯେବେ ଅହଂକାରର ହସ ଗୁଞ୍ଜିଲା
ସତୀତ୍ୱକୁ ଅପମାନର ଛାୟା ଛୁଇଁଲା
ସେବେ ପାଞ୍ଚାଳୀର ନୀରବ କ୍ରନ୍ଦନ
ଆକାଶକୁ ପ୍ରତିଧ୍ୱନିତ କଲା,
ତାଙ୍କ ଦୃଷ୍ଟିରେ ଜଳି ଉଠିଲା ଅଗ୍ନି…
ନ୍ୟାୟର ଦୀପ
ଅଦମ୍ୟ ପ୍ରତିଜ୍ଞା ।।

ବନବାସର ଦୀର୍ଘ ରାତିଗୁଡ଼ିକ
ଅଶ୍ରୁ ଓ ଧୈର୍ଯ୍ୟରେ ଲିଖିତ ହେଲା
ପ୍ରତିଟି ପ୍ରହର ହେଲା ଶପଥର ସ୍ମାରକ,
ତାଙ୍କ ନାମରେ ଧର୍ମର ଦାବି
ତାଙ୍କ ଅଭିମାନେ ଯୁଦ୍ଧର ଆରମ୍ଭ
ଶେଷରେ ରଣଭୂମି ହେଲା ସାକ୍ଷୀ
ଅନ୍ୟାୟର ଅହଂକାର ଭାଙ୍ଗି
ଧର୍ମର ସୂର୍ଯ୍ୟ ଉଦିଲା ରକ୍ତିମ ପ୍ରଭାତରେ ।।

ପାଞ୍ଚାଳୀର ଅଶ୍ରୁ ହେଲା
ଏକ ଯୁଗ ପରିବର୍ତ୍ତନର ଅଗ୍ନିବିଜ
ପାଞ୍ଚାଳୀ କେବଳ ଇତିହାସ ନୁହେଁ
ସେ ହେଉଛନ୍ତି ନାରୀ ସମ୍ମାନର ପ୍ରତୀକ
ଅଦମ୍ୟ ସ୍ୱରର ଜାଗରଣ
ଅନ୍ୟାୟ ବିରୋଧୀ ଅଗ୍ନିଶିଖା
ଯେଉଁଠି ଅପମାନର ଛାୟା ପଡ଼େ
ସେଠି ଆଜି ମଧ୍ୟ ଗୁଞ୍ଜିଉଠେ ତାଙ୍କ ନାମ
ପାଞ୍ଚାଳୀ…..
ଧର୍ମର ଦୀପ୍ତ ଗାଥା ।।

ପଦ୍ମପୁର, ବରଗଡ଼