ଆଜି ଧୋନୀ, ରୋହିତ ଲଢ଼େଇ
ମୁମ୍ବାଇ,୮ା୪(ପି.ଟି.): ଆଇପିଏଲ ଇତିହାସର ଦୁଇ ସଫଳତମ ଅଧିନାୟକ ରୋହିତ ଶର୍ମା ଓ ମହେନ୍ଦ୍ର ସିଂ ଧୋନୀଙ୍କ ମଧ୍ୟରେ ଶନିବାର ହେବ ମ୍ୟାଚ୍। ରୋହିତଙ୍କ ଶାନ୍ତ ସ୍ବଭାବ ଓ ଧୋନୀଙ୍କ ବୁଦ୍ଧି ମଧ୍ୟରେ ଏକ ସନ୍ତୁଳିତ ଲଢେଇ ଫ୍ୟାନମାନଙ୍କୁ ଦେଖିବାକୁ ମିଳିବ। ଆର୍ସିବି ବିପକ୍ଷ ପରାଜୟ ପରେ ମୁମ୍ବାଇ ଇଣ୍ଡିଆନ୍ସ ଏକ ସପ୍ତାହର ବିଶ୍ରାମ ପରେ ପଡିଆକୁ ଫେରୁଛି। ଅନ୍ୟ ପକ୍ଷରେ ଲକ୍ଷ୍ନୌ ସୁପର ଜାଏଣ୍ଟ୍ସ ବିପକ୍ଷରେ ବିଜୟ ପରେ ଧୋନୀଙ୍କ ସୁପର କିଙ୍ଗ୍ସ ମଧ୍ୟ ଆତ୍ମବିଶ୍ୱାସରେ ନଜର ଆସିବ। ଚଳିତ ସିଜନରେ ମୁମ୍ବାଇ ପ୍ରଥମ ଥର ପାଇଁ ଘରୋଇ ଦର୍ଶକଙ୍କ ସମ୍ମୁଖରେ ଓ୍ବାଙ୍ଖଡେରେ ଖେଳିବ। ପ୍ରଥମ ମ୍ୟାଚରେ ମୁମ୍ବାଇର ଟପ୍ ଅର୍ଡର ବିଫଳ ହୋଇଥିବା ବେଳେ ଚିନ୍ନାସ୍ବାମୀରେ ବିରାଟ କୋହଲି ଓ ଫାଫ ଡୁ ପ୍ଲେସି ଚାରିଆଡକୁ ଶଟ୍ ମାରିଥିଲେ। ଓ୍ବାଙ୍ଖଡେର ଟ୍ରାକ୍ ବ୍ୟାଟରଙ୍କୁ ସୁହାଉଥିବା ବେଳେ ଚେନ୍ନାଇ ପେସ୍ ବୋଲର ରାଜବର୍ଦ୍ଧନ ହଙ୍ଗରଗେକର ଓ ତୁଷାର ଦେଶପାଣ୍ଡେଙ୍କ ନିକଟରେ ଆବଶ୍ୟକ ଅଭିଜ୍ଞତା ନାହିଁ। ଏହାକୁ ନିଜ ସପକ୍ଷରେ ନେବା ପାଇଁ ମୁମ୍ବାଇ ପ୍ରୟାସ କରିପାରେ। ତେବେ ଦଳର ଭାଗ୍ୟ ନିର୍ଦ୍ଧାରଣ କରିବେ ଦୁଇ ସ୍ପିନ୍ ବୋଲର ମିଚେଲ୍ ସାଣ୍ଟନର ଓ ମୋଇନ୍ ଅଲୀ। ଚେନ୍ନାଇ ଦଳରେ ଯୋଗ ଦେଇଥିବା ସିସାନ୍ଦା ମଗଲା ଏହି ମ୍ୟାଚ୍ ପାଇଁ ଦଳରେ ସାମିଲ ହୋଇପାରନ୍ତି। ବିଗତ କିଛି ଆଇପିଏଲ୍ ସିଜନରେ ବଡ ଇନିଂସ ଖେଳି ନ ଥିବା ମୁମ୍ବାଇ ଅଧିନାୟକ ରୋହିତ ଶର୍ମାଙ୍କ ଉପରେ ବଡ ସ୍କୋରର ଚାପ ରହିବ। ଓ୍ବାଙ୍ଖଡେର ଦୁଇ ପାର୍ଶ୍ୱର ବାଉଣ୍ଡାରୀ ଛୋଟ ହୋଇଥିବାରୁ ଜୋଫ୍ରା ଆର୍ଚରଙ୍କ ବୋଲିଂ ରଣନୀତି ଉପରେ ସଭିଙ୍କ ନଜର ରହିବ। ଅର୍ଶଦ୍ ଖାନ୍ ଓ କାମେରୁନ୍ ଗ୍ରୀନଙ୍କ ପରି ବୋଲରଙ୍କ ବିପକ୍ଷରେ ଆକ୍ରମଣର ଯୋଜନା କରିପାରନ୍ତି ସିଏସ୍କେ ଓପନର ଡେଭନ୍ କନ୍ଓ୍ବେ ଓ ଋତୁରାଜ ଗାଏକ୍ୱାଡ। ଗାଏକ୍ୱାଡ ଚଳିତ ସିଜନରେ ଟପ୍ ଫର୍ମରେ ରହିଛନ୍ତି। ଅନ୍ୟ ପକ୍ଷରେ ବୁମ୍ରାଙ୍କ ଅନୁପସ୍ଥିତି ମଧ୍ୟ ମୁମ୍ବାଇର ସମସ୍ୟା ବଢାଇଛି। ରିଲି ମେରେଡିଥ୍ ଓ ସନ୍ଦୀପ ଓ୍ବାରିୟରଙ୍କ ପରି ବୋଲର ଦଳ ସହିତ ଥିବାରୁ ଏହା ବୋଲିଂ ଆକ୍ରମଣରେ ବିବିଧତା ସୃଷ୍ଟି କରିବ ବୋଲି କହିଛନ୍ତି ରୋହିତ ଶର୍ମା।