ବେଆଇନ ମଦ କାରବାର ବିରୋଧରେ ଗର୍ଜିଲେ ନାରୀ ଶକ୍ତି: ଜିଲ୍ଲାପାଳଙ୍କୁ ଦାବିପତ୍ର ପ୍ରଦାନ

ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକରେ ବଢ଼ି ଚାଲିଥିବା ବେଆଇନ ମଦ କାରବାର ଓ ଏହାଦ୍ୱାରା ସୃଷ୍ଟି ହେଉଥିବା ଅଶାନ୍ତି ବିରୋଧରେ ଏବେ ମହିଳାମାନେ ସଂଗଠିତ ହୋଇଛନ୍ତି। ତେନ୍ତୁଳିଖୁଣ୍ଟି ବ୍ଲକ ନାରୀ ମହାସଂଘ ପକ୍ଷରୁ ଅଞ୍ଚଳରେ ଚାଲିଥିବା ମଦ ଭାଟି ଓ ବେଆଇନ ମଦ ବ୍ୟବସାୟ ବନ୍ଦ କରିବା ପାଇଁ ଆଜି ଜିଲ୍ଲାପାଳଙ୍କୁ ଏକ ସ୍ମାରକପତ୍ର ପ୍ରଦାନ କରାଯାଇଛି।ଅଭିଯୋଗର ମୁଖ୍ୟ କାରଣ:ମହାସଂଘର ସଦସ୍ୟାମାନଙ୍କ ଅଭିଯୋଗ ଅନୁଯାୟୀ, ଅବକାରୀ ବିଭାଗର ନିୟମକୁ ଉଲ୍ଲଂଘନ କରି ବ୍ଲକର ବିଭିନ୍ନ ଗ୍ରାମରେ ଦିନକୁ ଦିନ ବେଆଇନ ମଦ ବ୍ୟବସାୟ ବୃଦ୍ଧି ପାଉଛି। ଏହା ଫଳରେ:ଗ୍ରାମାଞ୍ଚଳରେ ପାରିବାରିକ ଅଶାନ୍ତି ଓ ଘରୋଇ ହିଂସା ବଢୁଛି।ଯୁବପିଢ଼ି ପଥଭ୍ରଷ୍ଟ ହେବା ସହ ଅନୈତିକ କାର୍ଯ୍ୟକଳାପ ବୃଦ୍ଧି ପାଉଛି।୧୯୯୬ ପେସା ଆଇନ (PESA Act) ଏବଂ ପଞ୍ଚମ ଅନୁସୂଚୀ ଅଞ୍ଚଳର ନିୟମକୁ ଖୋଲାଖୋଲି ଉଲ୍ଲଂଘନ କରାଯାଉଛି।

ମହିଳା ମହାସଂଘର ୫ ଦଫା ଦାବି:୧. ତେନ୍ତୁଳିଖୁଣ୍ଟି ବ୍ଲକ ମଧ୍ୟରେ ଚାଲିଥିବା ସମସ୍ତ ବେଆଇନ ଦେଶୀ ଓ ବିଦେଶୀ ମଦ ଦୋକାନକୁ ତୁରନ୍ତ ବନ୍ଦ କରାଯାଉ।୨. ମଦ୍ୟପାନ କରି ଗାଁରେ ଅଶାନ୍ତି ସୃଷ୍ଟି କରୁଥିବା ବ୍ୟକ୍ତିଙ୍କ ବିରୋଧରେ କଠୋର ପଦକ୍ଷେପ ନିଆଯାଉ।୩. ନିଶାମୁକ୍ତ ଅଭିଯାନ ପାଇଁ ପୋଲିସ ଓ ନାରୀ ମହାସଂଘକୁ ନେଇ ଏକ ସ୍ୱତନ୍ତ୍ର କମିଟି ଗଠନ କରାଯାଉ।୪. ଗ୍ରାମାଞ୍ଚଳରେ ସଚେତନତା କାର୍ଯ୍ୟକ୍ରମ ପାଇଁ ସଭାଗୃହ ଯୋଗାଇ ଦିଆଯାଉ।୫. ସମ୍ବିଧାନର ଧାରା ୨୪୪(୧) ଅନୁସାରେ ସ୍ୱତନ୍ତ୍ର ଗ୍ରାମସଭା ଜରିଆରେ ମଦ କାରବାର ଉପରେ ରୋକ ଲଗାଯାଉ।ମହାସଂଘ ପକ୍ଷରୁ ଚେତାବନୀ ଦିଆଯାଇଛି ଯେ, ଯଦି ଆସନ୍ତା ୧୫ ଦିନ ମଧ୍ୟରେ ପ୍ରଶାସନ କୌଣସି ଦୃଢ଼ ପଦକ୍ଷେପ ଗ୍ରହଣ ନକରେ, ତେବେ ଆଗାମୀ ଦିନରେ ଆନ୍ଦୋଳନକୁ ଆହୁରି ତୀବ୍ର କରାଯିବ। ଏହି କାର୍ଯ୍ୟକ୍ରମରେ ତେନ୍ତୁଳିଖୁଣ୍ଟି ବ୍ଲକର ଶତାଧିକ ମହିଳା ଓ ବୁଦ୍ଧିଜୀବୀ ସାମିଲ ଥିଲେ।