ଲେଖିଛି ନାଁ ତୋର
ଶୀର୍ଷକ _ଲେଖିଛି ନାଁ ତୋର
ରୀତାରାଣୀ ଦାଶ
ବାଲେଶ୍ୱର
ହୃଦୟ ଦେଇ ମୁଁ ଭଲ ପାଉଥିଲି
ତୋର ବିନା କିଏ ଭରସା ମୋର
ହୃଦୟ ତନ୍ତ୍ରୀରେ ପ୍ରତି ସ୍ପନ୍ଦନରେ
ଲେଖା ଅଛି ସାଥି ନାମ ତୋହର |
ସପନ ନାୟିକା ଅଳସୀ ପ୍ରେମିକା
ଲାବଣ୍ୟବତୀ ଲୋ ମୋ ଅନୁପମା
ଚାରୁ ଚନ୍ଦ୍ର ସମ ବଦନର ଶୋଭା
କିଏ ସେ ଦେବ ଯେ ତୋର ଉପମା |
ଛାତି ତଳ ବ୍ୟଥା ବୁଝି ପାରିଲୁନି
ମରି କି ଜିଇଁଛି ତୋହରି ପାଇଁ
ଚେନାଏ ହସରେ ଫସିଲି ଲୋ ପ୍ରିୟା
କପଟ ଚାତୁରୀ ଖେଳିଲୁ ତୁହି |
ଅଝଟିଆ ମନ ବିରହର ଜ୍ୱାଳା
ସହି ତ ପାରୁନି ଯନ୍ତ୍ରଣା ଭାର
ଝୁରୁଛି ମଧୁର ସ୍ମୃତିର ମୁହୂର୍ତ୍ତ
ମରିବି ପାରୁନି ସ୍ମୃତି ସାଥିର |
ମୃଦୁ ମଳୟର ଉଲ୍ଲସିତ ମନ
ଅକୁହା ରହିଛି କେତେ କାହାଣୀ
ଜ୍ୟୋତ୍ସା ବିଧଉତ ରଜନୀ ବିତୁଛି
ଖୋଜି ଖୋଜି ତୋତେ ନୀଳ ନୟନୀ |
ଥରୁଟେ ଦେଖାରେ ବାଙ୍କ ଚାହାଁଣୀରେ
ଚୋରାଇଲୁ ଆତ୍ମା ଆଖି ପଲକେ
ବାୟା ହୋଇଗଲି ପ୍ରେମର ଯାଦୁରେ
ଲେଖିଲି ତ ନାମ ଏଇ ଛାତିରେ |
ସବୁ ଲାଗେ ପିତା ସମ୍ପର୍କର ମୋହ
ସର୍ବତ୍ର ନାଚୁଛି ତୋହରି ରୂପ
ମୋ ରାଣ ପ୍ରିୟା ଥରେ କହି ଯାଆ
ପ୍ରେମ ପ୍ରୀତି ଆମ ଅଲିଭା ଦୀପ |