ତୁ ଥିଲେ ମୋ ଡର କାହାକୁ
ତୁ ଥିଲେ ମୋ ଡର କାହାକୁ
ଡ. ପ୍ରେମାନନ୍ଦ ବେହେରା
ତୁ ଥିଲେ ମୋ ଡର କାହାକୁ
ମୋ ଜଗାକାଳିଆ
ଅନ୍ଧାର ରାତିରେ
ଘନ ଆଲୋକ ହେଉଛୁ ତୁ
ଝଡ଼ ଆସି
ମୋ ଦୁଆରେ ଠିଆ ହେଲେ
ତୋ ହାତର ସ୍ପର୍ଶେ
ଶାନ୍ତି ପାଏ ମୋ ମନ ।।
କାଳିଆ
ତୁ ହସିଲେ
ଆକାଶ ଖୋଲିଯାଏ
ମୋ ସବୁ ସନ୍ଦେହ
ଧୂଆଁ ପରି ହାରିଯାଏ
ତୋ ଆଖିରେ
ମୁଁ ଦେଖେ ଆଶାର ଦୀପ
ସେ ଆଲୋକରେ
ଭୟର ଛାୟା ହୁଏ ନିଃଶେଷ ।।
ପଥ ଯଦି ହୁଏ କଣ୍ଟକାକୀର୍ଣ୍ଣ
ତୁ ହେଉଛୁ
ମୋର ସାହସର କବଚ
ଲୋକେ ଯଦି କହନ୍ତି ଅସମ୍ଭବ କଥା
ତୋ ବିଶ୍ୱାସେ
ମୋ ହୃଦୟ ହୁଏ ଅଦମ୍ୟ
ତୁ ନଥିଲେ ମୁଁ ଶୂନ୍ୟ ପରି
ସମୟ ଥମିଯାଏ ନିରବରେ
ତୁ ଥିଲେ ପ୍ରତିଟି ଶ୍ୱାସରେ ସଙ୍ଗୀତ
ପ୍ରତିଟି ମୁହୂର୍ତ୍ତ ହୁଏ
ପର୍ବ ପରି ଆନନ୍ଦମୟ ।।
ମୋ ଦୁଃଖର ଘନ ମେଘରେ
ତୋ ନାମ ଶୁଣିଲେ
ବର୍ଷା ଆସି ଝରେ
ତୁ ହେଉଛୁ
ମୋ ଆଶ୍ରୟ, ମୋ ପ୍ରାର୍ଥନା
ମୋ ଜୀବନର
ସବୁଠୁ ମୂଲ୍ୟବାନ ଗାଥା ।।
ତୁ ଥିଲେ ମୋ ଡର କାହାକୁ
ଭାଗ୍ୟ ମଧ୍ୟ ହସି ହସି
ଆସି ମିଳେ ମୋ ପାଖରେ
ତୋ ସାଥିରେ
ମୁଁ ଜିତି ପାରେ ସମସ୍ତ ଜଗତ
କାରଣ ତୁ ହେଉଛୁ
ମୋର ଶକ୍ତି
ମୋର ସାହସ
ମୋର ଅସ୍ତିତ୍ୱର ସତ୍ୟ ।।
ପଦ୍ମପୁର, ବରଗଡ଼