କଟକରେ ଡିଜିଟାଲ୍ ଜୀବନ ପ୍ରମାଣପତ୍ର ଶିବିରରେ ଯୋଗଦେଲେ ପେନସନ୍ ବିଭାଗର ଅନୁସଚିବ

କଟକ,୧୩/୧୧/୨୦୨୬: ପେନସନ୍ ଏବଂ ପେନସନଭୋଗୀ କଲ୍ୟାଣ ବିଭାଗ (DoPPW)ର ଅନୁସଚିବ ଶ୍ରୀ ନାଗେନ୍ଦର କୁମାର ଆଜି କଟକସ୍ଥିତ ବି.ଏସ୍.ଏନ୍.ଏଲର ପ୍ରିନ୍ସିପାଲ୍ ଜି.ଏମ୍.ଟି.ଡି କାର୍ଯ୍ୟାଳୟଠାରେ ସଂଚାର ମନ୍ତ୍ରଣାଳୟ ଅଧୀନସ୍ଥ ଦୂରସଞ୍ଚାର ବିଭାଗର କଣ୍ଟ୍ରୋଲର୍ ଅଫ୍ କମ୍ୟୁନିକେସନ୍ ଆକାଉଣ୍ଟସ୍ (ସିସିଏ), ଓଡ଼ିଶା କାର୍ଯ୍ୟାଳୟ ଦ୍ୱାରା ଆୟୋଜିତ ରାଷ୍ଟ୍ରବ୍ୟାପୀ ଡିଜିଟାଲ୍ ଜୀବନ ପ୍ରମାଣପତ୍ର ଅଭିଯାନର ପଞ୍ଚମ ଆଉଟରିଚ୍ ଶିବିରରେ ଯୋଗ ଦେଇଛନ୍ତି।ତାଙ୍କର ଏହି ଗସ୍ତ ସମୟରେ ଶ୍ରୀ ନାଗେନ୍ଦର କୁମାର ପେନସନଭୋଗୀ ଏବଂ ପାରିବାରିକ ପେନସନଭୋଗୀମାନଙ୍କ ସହ ଆଲୋଚନା କରିଥିଲେ, ଡିଜିଟାଲ୍ ଜୀବନ ପ୍ରମାଣପତ୍ର ପ୍ରସ୍ତୁତି ପ୍ରକ୍ରିୟା ପ୍ରତ୍ୟକ୍ଷ ଭାବେ ଦେଖିଥିଲେ ଏବଂ ବ୍ୟକ୍ତିଗତ ଭାବେ କିଛି ପେନସନଭୋଗୀଙ୍କ ପାଇଁ ଡିଜିଟାଲ୍ ଜୀବନ ପ୍ରମାଣପତ୍ର ପ୍ରସ୍ତୁତିରେ ସହାୟତା କରିଥିଲେ। ପେନସନ୍ ସମ୍ବନ୍ଧୀୟ ସେବା ପାଇବା କ୍ଷେତ୍ରରେ ସେମାନଙ୍କର ଅଭିଜ୍ଞତା, ଅସୁବିଧା ଏବଂ ଆଶା ସମ୍ପର୍କରେ ମଧ୍ୟ ସେ ଗୁରୁତ୍ୱପୂର୍ଣ୍ଣ ମତାମତ ସଂଗ୍ରହ କରିଥିଲେ।ତାଙ୍କର ଏହି ଆଲୋଚନା ପେନସନଭୋଗୀ, ବିଶେଷକରି ବୟସ୍କ ଏବଂ ଡିଜିଟାଲ୍ କ୍ଷେତ୍ରରେ କମ୍ ଅଭିଜ୍ଞତା ଥିବା ହିତାଧିକାରୀମାନେ ସମ୍ମୁଖୀନ ହେଉଥିବା ତୃଣମୂଳ ସ୍ତରର ସମସ୍ୟାଗୁଡ଼ିକୁ ବୁଝିବା ଏବଂ ସୁଗମ, ସୁବିଧାଜନକ ତଥା ଝାମେଲାମୁକ୍ତ ପେନସନ୍ ସେବା ସୁନିଶ୍ଚିତ କରିବା ପାଇଁ ଦୂରସଞ୍ଚାର ବିଭାଗ ଏବଂ ସି.ସି.ଏ, ଓଡ଼ିଶା କାର୍ଯ୍ୟାଳୟ ଦ୍ୱାରା କରାଯାଉଥିବା ପ୍ରୟାସକୁ ପ୍ରଶଂସା କରିବାର ଏକ ସୁଯୋଗ ପ୍ରଦାନ କରିଥିଲା।ତୃଣମୂଳ ସ୍ତରରେ ପେନସନଭୋଗୀମାନଙ୍କ ନିକଟରେ ଡିଜିଟାଲ୍ ପଦକ୍ଷେପଗୁଡ଼ିକର ସୁଫଳ ପହଞ୍ଚାଇବା ପାଇଁ ପେନସନ୍ ଏବଂ ପେନସନଭୋଗୀ କଲ୍ୟାଣ ବିଭାଗ ଏବଂ ଦୂରସଞ୍ଚାର ବିଭାଗ ମଧ୍ୟରେ ଘନିଷ୍ଠ ସମନ୍ୱୟର ଗୁରୁତ୍ୱକୁ ଏହି ଗସ୍ତ ଗୁରୁତ୍ୱ ପ୍ରଦାନ କରିଛି।ଡିଜିଟାଲ୍ ଜୀବନ ପ୍ରମାଣପତ୍ରର ସୁବିଧାଜନକ, ସୁଗମ ଏବଂ ପ୍ରଯୁକ୍ତିବିଦ୍ୟା-ଆଧାରିତ ଦାଖଲ ମାଧ୍ୟମରେ ପେନସନଭୋଗୀମାନଙ୍କ ଜୀବନଧାରଣର ସହଜତାକୁ ପ୍ରୋତ୍ସାହିତ କରିବା ଉଦ୍ଦେଶ୍ୟରେ ପେନସନ୍ ଏବଂ ପେନସନଭୋଗୀ କଲ୍ୟାଣ ବିଭାଗର ତତ୍ତ୍ୱାବଧାନରେ ରାଷ୍ଟ୍ରବ୍ୟାପୀ ଡି.ଏଲ୍.ସି ଅଭିଯାନ- ୫.୦ ପରିଚାଳିତ ହେଉଛି।ସି.ସି.ଏ, ଓଡ଼ିଶା କାର୍ଯ୍ୟାଳୟ ସମଗ୍ର ରାଜ୍ୟରେ ପ୍ରାୟ ୬,୪୦୦ ଟେଲିକମ୍ ଏବଂ ବି.ଏସ୍.ଏନ୍.ଏଲ୍ ପେନସନଭୋଗୀ ଓ ପାରିବାରିକ ପେନସନଭୋଗୀଙ୍କୁ ସେବା ଯୋଗାଇ ଦେଉଛି, ଯେଉଁମାନଙ୍କ ମଧ୍ୟରୁ ୨,୦୦୦ରୁ ଅଧିକ ପେନସନଭୋଗୀଙ୍କର ନଭେମ୍ବର ୨୦୨୬ରେ ଡିଜିଟାଲ୍ ଜୀବନ ପ୍ରମାଣପତ୍ର ଦାଖଲ କରିବାର ସମୟ ହୋଇଛି। ଏହି ପେନସନଭୋଗୀମାନଙ୍କୁ ସୁବିଧା ଯୋଗାଇଦେବା ପାଇଁ, ସି.ସି.ଏ ଓଡ଼ିଶା ବ୍ୟାପକ ଆଉଟରିଚ୍ କାର୍ଯ୍ୟକ୍ରମ ହାତକୁ ନେଇଛି ଏବଂ ରାଜ୍ୟର ବିଭିନ୍ନ ସ୍ଥାନରେ ଶିବିର ଆୟୋଜନ କରୁଛି। ରାଷ୍ଟ୍ରବ୍ୟାପୀ ଡି.ଏଲ୍.ସି ଅଭିଯାନ ୫.୦ ଅଧୀନରେ, ନଭେମ୍ବର ୨୦୨୬ ମାସରେ ସି.ସି.ଏ, ଓଡ଼ିଶା କାର୍ଯ୍ୟାଳୟ ପକ୍ଷରୁ ୦୨.୧୧.୨୦୨୬ରେ ରାଉରକେଲା, ୦୩.୧୧.୨୦୨୬ ଏବଂ ୦୪.୧୧.୨୦୨୬ରେ ସମ୍ବଲପୁର, ୧୦.୧୧.୨୦୨୬ରେ ବ୍ରହ୍ମପୁର ଏବଂ ୧୧.୧୧.୨୦୨୬ରେ ଫୁଲବାଣୀଠାରେ ଶିବିରଗୁଡ଼ିକ ସମ୍ପନ୍ନ ହୋଇସାରିଛି, ଏବଂ ୧୩.୧୧.୨୦୨୬ରେ କଟକ ଶିବିର ଏହି ଅଭିଯାନର ପଞ୍ଚମ ଶିବିର ଅଟେ। ଏହି ଶିବିରଗୁଡ଼ିକ ଡି.ଏଲ୍.ସି ପ୍ରସ୍ତୁତିରେ ସହାୟତା କରିବା ସହ ଫେସ୍ ଅଥେଣ୍ଟିକେସନ୍ ବିଷୟରେ ପ୍ରତ୍ୟକ୍ଷ ପ୍ରଶିକ୍ଷଣ ପ୍ରଦାନ କରୁଛି ଏବଂ ପେନସନଭୋଗୀଙ୍କ ଅଭିଯୋଗ ଓ ପେନସନ୍ ସମ୍ବନ୍ଧୀୟ ଅନ୍ୟାନ୍ୟ ସମସ୍ୟାର ସମାଧାନ କରୁଛି।ସମାବେଶୀ ଏବଂ ପେନସନଭୋଗୀ-ଅନୁକୂଳ ସେବା ପ୍ରଦାନ ପ୍ରତି ନିଜର ପ୍ରତିବଦ୍ଧତା ପ୍ରଦର୍ଶନ କରି, ଏହି ଅଭିଯାନ ଅତି-ବରିଷ୍ଠ ନାଗରିକ ଏବଂ ଶଯ୍ୟାଶାୟୀ ପେନସନଭୋଗୀମାନଙ୍କ ପାଇଁ ଘର ପାଖରେ ଡି.ଏଲ୍.ସି ସେବା ଉପରେ ମଧ୍ୟ ବିଶେଷ ଗୁରୁତ୍ୱ ଦେଉଛି, ଯାହାଫଳରେ ବୟସ, ଅସୁସ୍ଥତା କିମ୍ବା ଚଳପ୍ରଚଳ ଅସୁବିଧା ହେତୁ କୌଣସି ପେନସନଭୋଗୀ ଅତ୍ୟାବଶ୍ୟକ ସେବାରୁ ବଞ୍ଚିତ ହେବେ ନାହିଁ।ଏହି ପ୍ରସ୍ତୁତିମୂଳକ ପ୍ରୟାସଗୁଡ଼ିକ ଉତ୍ସାହଜନକ ଫଳାଫଳ ପ୍ରଦାନ କରିଛି, କାରଣ ଅଭିଯାନର ପ୍ରାରମ୍ଭିକ ପର୍ଯ୍ୟାୟରେ ଫେସ୍ ଅଥେଣ୍ଟିକେସନ୍ ପ୍ରଯୁକ୍ତିବିଦ୍ୟା ମାଧ୍ୟମରେ ୪୫୦ରୁ ଅଧିକ ଡିଜିଟାଲ୍ ଜୀବନ ପ୍ରମାଣପତ୍ର ପ୍ରସ୍ତୁତ ହୋଇସାରିଛି। ଏହି ପ୍ରୟାସଗୁଡ଼ିକ ଡିଜିଟାଲ୍ ସଶକ୍ତିକରଣ ଏବଂ ପେନସନଭୋଗୀମାନଙ୍କୁ ଘରେ ବସି ସ୍ୱାଧୀନ ଭାବେ ସେମାନଙ୍କର ଜୀବନ ପ୍ରମାଣପତ୍ର ପ୍ରସ୍ତୁତ କରିବାରେ ସକ୍ଷମ କରାଇବା ଦିଗରେ ସି.ସି.ଏ ଓଡ଼ିଶାର ସକ୍ରିୟ ଆଭିମୁଖ୍ୟକୁ ପ୍ରତିଫଳିତ କରେ।ଏହି ପଦକ୍ଷେପ ଡିଜିଟାଲ୍ ସଶକ୍ତିକରଣ, ଆନ୍ତଃ-ବିଭାଗୀୟ ସମନ୍ୱୟ ଏବଂ ପେନସନଭୋଗୀମାନଙ୍କ ସହ ସିଧାସଳଖ ସମ୍ପର୍କ ମାଧ୍ୟମରେ ପେନସନଭୋଗୀ-କୈନ୍ଦ୍ରିକ ସେବା ପ୍ରଦାନକୁ ସୁଦୃଢ଼ କରିବା ପାଇଁ ସରକାରଙ୍କ ନିରନ୍ତର ପ୍ରତିବଦ୍ଧତାକୁ ପ୍ରତିଫଳିତ କରେ।