ନୂଆ ମହାମାରୀର ମୁକାବିଲା ପାଇଁ ପ୍ରସ୍ତୁତିରେ ନହେଉ ବିଳମ୍ବ: ଡବ୍ଲୁଏଚଓ ମୁଖ୍ୟ

ଜେନେଭା,୨୪।୫ : ବିଶ୍ୱ ସ୍ବାସ୍ଥ୍ୟ ସଂଗଠନ(ଡବ୍ଲୁଏଚଓ)ର ୭୬ ତମ ସାଧାରଣସଭା ସ୍ବିଜରଲାଣ୍ଡର ଜେନେଭାରେ ଆରମ୍ଭ ହୋଇଛି। ସଭାରେ ଜୀବନ ବଞ୍ଚାଇବା, ସମସ୍ତଙ୍କ ପାଇଁ ସ୍ବାସ୍ଥ୍ୟସେବା ଉପରେ ଗୁରୁତ୍ୱାରୋପ କରାଯାଇଛି। ଚଳିତ ବର୍ଷ ଡବ୍ଲୁଏଚଓର ପ୍ରତିଷ୍ଠା ହେବାର ୭୫ ତମ ବାର୍ଷିକୀ ପୂରଣ ହୋଇଛି। ୧୦ ଦିନ ଧରି ଚାଲିଥିବା ଏହି କାର୍ଯ୍ୟକ୍ରମରେ ଅନେକ ଗୁରୁତ୍ୱପୂର୍ଣ୍ଣ ବିଷୟ ଉପରେ ଆଲୋଚନା ହେବ।

ଏହି ସମ୍ମିଳନୀରେ ଡବ୍ଲୁଏଚଓ ମୁଖ୍ୟ ଟେଡ୍ରୋସ ଆଧାନୋମ ଘେବ୍ରୟୌସ କହିଛନ୍ତି ପରବର୍ତ୍ତୀ ମହାମାରୀର ମୁକାବିଲା ପାଇଁ ପ୍ରସ୍ତୁତି ବର୍ତ୍ତମାନଠାରୁ ଆରମ୍ଭ ହେବା ଆବଶ୍ୟକ। ଏନେଇ ବିଳମ୍ବ କରା ନ ଯାଉ। ଯଦି ପ୍ରସ୍ତୁତି ବର୍ତ୍ତମାନ ନହୁଏ, ତେବେ ଏହା ଆଉ କେବେ ହୋଇ ପାରିବ ନାହିଁ ।

ବିଶ୍ୱ ସ୍ବାସ୍ଥ୍ୟ ସଂଗଠନ ସଦସ୍ୟ ଦେଶଗୁଡିକୁ ସଂସ୍କାର ଆଣିବା, ଅର୍ଥ ବୃଦ୍ଧି ଏବଂ ପରବର୍ତ୍ତୀ ମହାମାରୀ ପାଇଁ ପ୍ରସ୍ତୁତ ହେବାକୁ ଦାବି କରୁଛି। କୋଭିଡ -୧୯ ଉପରେ ଡବ୍ଲୁଏଚଓ ଦ୍ୱାରା ଜାରି କରାଯାଇଥିବା ଜରୁରୀକାଳୀନ ପରିସ୍ଥିତି ନିକଟରେ ସମାପ୍ତ ହୋଇଛି ଏବଂ ଏହା ଆଉ ମହାମାରୀ ନୁହେଁ ବୋଲି କୁହାଯାଇଛି।

ଘେବ୍ରେୟସସ କହିଛନ୍ତି. ଆମେ ପରିବର୍ତ୍ତନ ନ କଲେ ଏହାକୁ କିଏ କରିବ? ଯଦି ବର୍ତ୍ତମାନ କୌଣସି ପରିବର୍ତ୍ତନ କରା ନ ଯାଏ, ତେବେ ଏହା ଆଉ କେବେ ଘଟିବ? ’ ଆଗାମୀ ମହାମାରୀକୁ ରୋକିବା ପାଇଁ ଆଗୁଆ ଆଲୋଚନା କରିବା ଏବଂ ପ୍ରସ୍ତୁତି ପାଇଁ ଏବେ ହେଉଛି ଉପଯୁକ୍ତ ସମୟ ।

ମହାମାରୀ ପ୍ରତି ଚଳିତ ପିଢ଼଼ିର ପ୍ରତିବଦ୍ଧତା ଗୁରୁତ୍ୱପୂର୍ଣ୍ଣ। କାରଣ ଏହି ପିଢ଼ି ହିଁ ଅନୁଭବ କରିଛି ଏକ ଛୋଟ ଭୁତାଣୁ ସେମାନଙ୍କ ଜୀବନ ପାଇଁ କେତେ ବିପଦପୂର୍ଣ୍ଣ ହୋଇପାରେ।
ବିଶ୍ୱ ସୱାସ୍ଥ୍ୟ ସଂଗଠନ ପ୍ରତି ବିଶ୍ୱର ଆଶା ବହୁଗୁଣିତ ହୋଇଥିବାରୁ ସଂଗଠନ ଜଟିଳ ଆହ୍ବାନର ସମ୍ମୁଖୀନ ହୋଇଛି।