ବିପଦସଙ୍କୁଳ ଅବସ୍ଥାରେ ବ୍ରାହ୍ମଣପାଦ ପୁରୁଣା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର।
ଚକାପାଦ, କନ୍ଧମାଳ ଜିଲ୍ଲା ଚକାପାଦ ବ୍ଲକ୍ ଅନ୍ତର୍ଗତ ବ୍ରାହ୍ମଣପାଦ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର (ସିଏଚ୍ସି) ପୁରୁଣା କୋଠାଘର ଏବେ ଅତ୍ୟନ୍ତ ଅସୁରକ୍ଷିତ ଓ ବିପଜ୍ଜନକ ଅବସ୍ଥାରେ ପହଞ୍ଚିଛି। ଅଞ୍ଚଳରେ ଲାଗିରହିଥିବା ଲଗାଣ ବର୍ଷା ପ୍ରଭାବରେ ଡାକ୍ତରଖାନାର ବିଭିନ୍ନ ବିଭାଗର ଛାତରୁ ସିମେଣ୍ଟ ପଲସ୍ତରା ବାରମ୍ବାର ଖସିପଡ଼ିବାରେ ଲାଗିଛି। ଫଳରେ ଏଠାରେ ଚିକିତ୍ସିତ ହେଉଥିବା ନିରୀହ ରୋଗୀ, ସେମାନଙ୍କ ସମ୍ପର୍କୀୟ ତଥା କାର୍ଯ୍ୟରତ ଡାକ୍ତର ଓ ସ୍ୱାସ୍ଥ୍ୟ କର୍ମଚାରୀଙ୍କ ଅମୂଲ୍ୟ ଜୀବନ ପ୍ରତି ଗମ୍ଭୀର ବିପଦ ସୃଷ୍ଟି ହୋଇଛି। ପ୍ରତି ମୁହୂର୍ତ୍ତରେ ଏକ ବଡ଼ ଧରଣର ଦୁର୍ଘଟଣାର ଆଶଙ୍କା ଲାଗି ରହିଥିବାରୁ ସାଧାରଣ ଲୋକଙ୍କ ମଧ୍ୟରେ ତୀବ୍ର ଅସନ୍ତୋଷ ଓ ଉଦ୍ବେଗ ପ୍ରକାଶ ପାଇଛି। ବର୍ତ୍ତମାନ ଏହି ଜରାଜୀର୍ଣ୍ଣ ପୁରୁଣା କୋଠାରେ ବହିର୍ବିଭାଗ (ଓପିଡି), ଅନ୍ତର୍ବିଭାଗ (ଆଇପିଡି), ଔଷଧ ବିତରଣ କେନ୍ଦ୍ର, ରୋଗ ନିଦାନ ପରୀକ୍ଷାଗାର (ପାଥୋଲୋଜି), ଦନ୍ତଚିକିତ୍ସା ବିଭାଗ, ସେବିକା ପ୍ରକୋଷ୍ଠ ଏବଂ ପ୍ରସୂତି କକ୍ଷ ଭଳି ସମସ୍ତ ଗୁରୁତ୍ୱପୂର୍ଣ୍ଣ ସ୍ୱାସ୍ଥ୍ୟସେବା ସଞ୍ଚାଳିତ ହେଉଛି। କିନ୍ତୁ ପୂର୍ବ ବର୍ଷା ତଥା “ଅର୍ଣ୍ଣବ” ବାତ୍ୟା ପ୍ରଭାବରେ ହୋଇଥିବା ପ୍ରବଳ ଲଗାଣ ବର୍ଷା ପରେ ପ୍ରାୟ ପାଞ୍ଚଟି ଭିନ୍ନ ଭିନ୍ନ ସ୍ଥାନରେ ତଳପଟୁ ଛାତ ଭାଙ୍ଗି ସିମେଣ୍ଟ ଓ କଂକ୍ରିଟ୍ ଖସି ତଳେ ପଡ଼ିଥିଲା। ବିଶେଷ କରି ଦୁଇଟି ସ୍ଥାନରେ ଛାତ ସମ୍ପୂର୍ଣ୍ଣ ନଷ୍ଟ ହୋଇ କଳଙ୍କିଲଗା ଲୁହା ରଡ୍ ବାହାରକୁ ଦେଖାଯାଉଥିବାର ଦୃଶ୍ୟ ସମ୍ପର୍କରେ ଜିଲ୍ଲାପାଳଙ୍କ ଦୃଷ୍ଟି ଆକର୍ଷଣ କରାଯାଇଥିଲା। ଘଟଣାର ସମ୍ବେଦନ ଶୀଳତାକୁ ଉପଲବ୍ଧି କରି ଜିଲ୍ଲାପାଳ ତୁରନ୍ତ ଏହାର ଉଚ୍ଚସ୍ତରୀୟ କ୍ଷେତ୍ର ପରିଦର୍ଶନ ଓ ତଦାରଖ ପାଇଁ ନିର୍ଦ୍ଦେଶ ଦେଇଥିଲେ। ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ଜିଲ୍ଲା ମୁଖ୍ୟ ଚିକିତ୍ସାଳୟର ଡିଏମ୍ଓ ତଥା ସୁପରିଷ୍ଟେଣ୍ଡେଣ୍ଟ ଡାକ୍ତର ଅକ୍ଷୟ ସାହୁ ଏବଂ ଅନ୍ୟାନ୍ୟ ବରିଷ୍ଠ ଅଧିକାରୀମାନେ ତତ୍କ୍ଷଣାତ୍ ବ୍ରାହ୍ମଣପାଦ ସ୍ୱାସ୍ଥ୍ୟକେନ୍ଦ୍ରରେ ପହଞ୍ଚି ସ୍ଥିତି ଅନୁଧ୍ୟାନ କରିଥିଲେ। ପରିସ୍ଥିତିର ଗମ୍ଭୀରତାକୁ ଅନୁଭବ କରି ରୋଗୀ ଓ କର୍ମଚାରୀଙ୍କ ସୁରକ୍ଷା ଦୃଷ୍ଟିରୁ ତୁରନ୍ତ ଓପିଡି ଓ ଆଇପିଡି ସେବାକୁ ନିକଟସ୍ଥ କୋଭିଡ୍ ଆଇସୋଲେସନ୍ ଗୃହକୁ ସ୍ଥାନାନ୍ତରିତ କରାଯିବ ବୋଲି ଡିଏମ୍ଓ ଡାକ୍ତର ସାହୁ ଗଣମାଧ୍ୟମକୁ ସୂଚନା ଦେଇଛନ୍ତି। ଅନ୍ୟପକ୍ଷରେ, ଡାକ୍ତରଖାନାର ଭିତ୍ତିଭୂମି ବିକାଶ କାର୍ଯ୍ୟରେ ଚରମ ପ୍ରଶାସନିକ ଅବହେଳା ଓ ମନ୍ଥରତା ସ୍ପଷ୍ଟ ବାରି ହୋଇପଡ଼ୁଛି। ଏହି ସ୍ୱାସ୍ଥ୍ୟକେନ୍ଦ୍ର ପାଇଁ ୨୦୧୭ ମସିହାରୁ ଏକ ନୂତନ କୋଠା ନିର୍ମାଣ କାର୍ଯ୍ୟ ଚାଲିଥିଲେ ହେଁ ଦୀର୍ଘ ସାତ ବର୍ଷ ବିତିଯିବା ପରେ ମଧ୍ୟ ତାହା ଅଦ୍ୟାବଧି ସମ୍ପୂର୍ଣ୍ଣ ହୋଇପାରିନାହିଁ। ସେହିପରି ଅନ୍ୟ ଏକ ନୂତନ ବିପିଏଚ୍ଓ (ବ୍ଲକ୍ ପବ୍ଲିକ୍ ହେଲ୍ଥ୍ ୟୁନିଟ୍) କୋଠାର ନିର୍ମାଣ କାର୍ଯ୍ୟ ଶେଷ ହୋଇଥିଲେ ସୁଦ୍ଧା ତାହା ଏପର୍ଯ୍ୟନ୍ତ ବିଭାଗକୁ ହସ୍ତାନ୍ତର କରାଯାଇ ନାହିଁ। ଫଳରେ ଲକ୍ଷ ଲକ୍ଷ ଟଙ୍କାର ସରକାରୀ ଅର୍ଥ ଖର୍ଚ୍ଚ ହୋଇ ଅଟ୍ଟାଳିକା ଠିଆ ହୋଇଥିଲେ ସୁଦ୍ଧା ସାଧାରଣ ଗରିବ ଲୋକେ ତା’ର ସୁଫଳ ପାଇବାରୁ ବଞ୍ଚିତ ହେଉଛନ୍ତି। ଯଦିଓ କୋଭିଡ୍ ଆଇସୋଲେସନ୍ ଗୃହକୁ ସ୍ୱାସ୍ଥ୍ୟକେନ୍ଦ୍ରର ମୁଖ୍ୟ ସେବା ସ୍ଥାନାନ୍ତର କରିବା ପାଇଁ ନିଷ୍ପତ୍ତି ନିଆଯାଇଛି, ତଥାପି ସେଠାରେ ରୋଗୀ ଓ କର୍ମଚାରୀଙ୍କ ପାଇଁ ଏକ ଓଭରହେଡ୍ ପାଣି ଟାଙ୍କିର ଜରୁରୀ ଆବଶ୍ୟକତା ରହିଛି। ପର୍ଯ୍ୟାପ୍ତ ପାନୀୟ ଜଳ ଏବଂ ନିରବଚ୍ଛିନ୍ନ ଜଳ ଯୋଗାଣ ସୁବିଧା ନ ହେଲେ ନୂତନ ସ୍ଥାନରେ ମଧ୍ୟ ରୋଗୀଙ୍କୁ ନାହିଁ ନଥିବା ହଇରାଣ ହରକତ ହେବାକୁ ପଡ଼ିବ। ଏଭଳି ଜଟିଳ ସ୍ଥିତିରେ ବିପର୍ଯ୍ୟସ୍ତ ସ୍ୱାସ୍ଥ୍ୟସେବାର ସୁଧାର, ଅଧୁରା ନୂତନ କୋଠାର କାର୍ଯ୍ୟ ତୁରନ୍ତ ଶେଷ କରିବା ଏବଂ ରୋଗୀଙ୍କ ଜୀବନ ସୁରକ୍ଷା ପାଇଁ ଜିଲ୍ଲା ପ୍ରଶାସନ କେବେ କାର୍ଯ୍ୟାନୁଷ୍ଠାନ ଗ୍ରହଣ କରୁଛି, ତାହାକୁ ସ୍ଥାନୀୟ ବାସିନ୍ଦା ଚାହିଁ ରହିଛନ୍ତି।ଉଲ୍ଲେଖଯୋଗ୍ୟ ଯେ ବ୍ରାହ୍ମଣପାଦ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଉପରେ ସ୍ଥାନୀୟ ବ୍ଲକର ବହୁ ପଞ୍ଚାୟତ ତଥା ଦୁର୍ଗମ ଆଦିବାସୀ ଅଧ୍ୟୁଷିତ ଗ୍ରାମର ହଜାର ହଜାର ଲୋକ ନିର୍ଭର କରିଥାନ୍ତି। ମୌଳିକ ସ୍ୱାସ୍ଥ୍ୟସେବା ପାଇଁ ଅନ୍ୟ କୌଣସି ବିକଳ୍ପ ନ ଥିବାରୁ ପ୍ରତିଦିନ ଶହ ଶହ ରୋଗୀ ଏଠାକୁ ଆସନ୍ତି। ମାତ୍ର ଭଙ୍ଗା ଦଦରା କୋଠାରେ ଜୀବନକୁ ବାଜି ଲଗାଇ ଚିକିତ୍ସା ନେବାକୁ ପଡ଼ୁଥିବାରୁ ସ୍ଥାନୀୟ ଅଞ୍ଚଳବାସୀଙ୍କ ମଧ୍ୟରେ ତୀବ୍ର କ୍ଷୋଭ ପ୍ରକାଶ ପାଇଛି। ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ଦେଇ ସ୍ଥାୟୀ ପ୍ରତିକାର ନ କଲେ ଆଗାମୀ ଦିନରେ ଜନଅସନ୍ତୋଷ ତୀବ୍ରତର ହୋଇ ବ୍ୟାପକ ଆନ୍ଦୋଳନ ସୃଷ୍ଟି ହେବାର ସମ୍ଭାବନା ରହିଛି ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି।