ତୀର୍ଥକ୍ଷେତ୍ର’ ଖବରର ପ୍ରଭାବ: ଗୁଣପୁର ଶ୍ରୀ ଜଗନ୍ନାଥ ମନ୍ଦିର କାନ୍ଥରୁ ହଟିଲା ପୂଜକଙ୍କ ପୁଅଙ୍କ କ୍ୟୁଆର୍ କୋଡ୍

ଗୁଣପୁର (୪/୧୦): ଗୁଣପୁର ଶ୍ରୀ ଜଗନ୍ନାଥ ମନ୍ଦିରକୁ ନେଇ ସେପ୍ଟେମ୍ବର ୨୬ ତାରିଖରେ ‘ତୀର୍ଥକ୍ଷେତ୍ର’ରେ ପ୍ରକାଶିତ ଖବର ପରେ ମନ୍ଦିର ଭିତରେ ଥିବା ହୁଣ୍ଡୀ ପଛ କାନ୍ଥରେ ଲାଗିଥିବା ପୂଜକଙ୍କ ପୁଅଙ୍କ ବ୍ୟାଙ୍କ କ୍ୟୁଆର୍ କୋଡ୍ ହଟିଥିବା ଦେଖିବାକୁ ମିଳିଛି।ଅଭିଯୋଗ ଅନୁଯାୟୀ, ଭକ୍ତମାନେ ଦାନ କରୁଥିବା ହୁଣ୍ଡୀର ପଛ କାନ୍ଥରେ ଏହି କ୍ୟୁଆର୍ କୋଡ୍ ଲାଗିଥିଲା। ଏହାକୁ ସ୍କାନ୍ କଲେ ଜଣେ ପୂଜକଙ୍କ ପୁଅଙ୍କ ନାମ ପ୍ରଦର୍ଶିତ ହେଉଥିବା ନେଇ ପୂର୍ବରୁ ପ୍ରଶ୍ନ ଉଠିଥିଲା। ମନ୍ଦିର ଦେବୋତ୍ତର ବିଭାଗ ଅଧୀନରେ ଥିବାରୁ ଏଭଳି କ୍ୟୁଆର୍ କୋଡ୍ କେଉଁ ଅନୁମତିରେ ଲଗାଯାଇଥିଲା ଏବଂ ଏହା ମନ୍ଦିରର ଅଧିକୃତ ଡିଜିଟାଲ୍ ଦାନ ବ୍ୟବସ୍ଥା କି ନୁହେଁ, ତାହାକୁ ନେଇ ଭକ୍ତମାନଙ୍କ ମଧ୍ୟରେ ପ୍ରଶ୍ନ ଉଠିଥିଲା।ସେପ୍ଟେମ୍ବର ୨୬ ତାରିଖରେ ‘ତୀର୍ଥକ୍ଷେତ୍ର’ରେ ଏନେଇ ଖବର ପ୍ରକାଶ ପାଇବା ପରେ ଘଟଣାଟି ଚର୍ଚ୍ଚାକୁ ଆସିଥିଲା। ଏହାପରେ ଦେବୋତ୍ତର ବିଭାଗ ପକ୍ଷରୁ କ୍ୟୁଆର୍ କୋଡ୍ ହଟାଇବାକୁ ନିର୍ଦ୍ଦେଶ ଦିଆଯାଇଥିବା ଜଣାପଡ଼ିଛି। ଦେବୋତ୍ତର ବିଭାଗର ନିର୍ଦ୍ଦେଶ ପରେ ମନ୍ଦିର ଭିତରେ ଥିବା ହୁଣ୍ଡୀ ପଛ କାନ୍ଥରୁ ପୂଜକଙ୍କ ପୁଅଙ୍କ ବ୍ୟାଙ୍କ କ୍ୟୁଆର୍ କୋଡ୍ ହଟିଥିବା ଦେଖିବାକୁ ମିଳିଛି।ଗୁଣପୁର ଶ୍ରୀ ଜଗନ୍ନାଥ ମନ୍ଦିରକୁ ନେଇ ପୂର୍ବରୁ ମଧ୍ୟ ଏକାଧିକ ଘଟଣା ଚର୍ଚ୍ଚାରେ ରହିଛି। ପୂର୍ବରୁ ମନ୍ଦିରର ସିସିଟିଭି କ୍ୟାମେରାର ତାର ପୂଜାରୀ ମାନଙ୍କ ଦ୍ୱାରା ଖୋଲି ଦିଆଯିବା ନେଇ ଅଭିଯୋଗ ହୋଇଥିଲା। ମନ୍ଦିରର ସୁରକ୍ଷା ବ୍ୟବସ୍ଥା ସହ ଜଡ଼ିତ ଏହି ଘଟଣାକୁ ନେଇ ଆପତ୍ତି ଓ ଅସନ୍ତୋଷ ପ୍ରକାଶ ପାଇଥିଲା।ଏହାପରେ ମନ୍ଦିର ବଗିଚାରୁ ପଇଡ଼ ତୋଳାଇ ବିକ୍ରି କରାଯିବା ଘଟଣାକୁ ନେଇ ମଧ୍ୟ ପ୍ରଶ୍ନ ଉଠିଥିଲା। ମନ୍ଦିର ସମ୍ପତ୍ତିରୁ ମିଳୁଥିବା ଆୟର ହିସାବ କିପରି ରଖାଯାଉଛି ଏବଂ ଏଥିପାଇଁ କିଏ ଅନୁମତି ଦେଉଛନ୍ତି, ତାହା ନେଇ ମଧ୍ୟ ଭକ୍ତମାନଙ୍କ ମଧ୍ୟରେ ପ୍ରଶ୍ନ ରହିଛି।ବର୍ତ୍ତମାନ ମନ୍ଦିର ଭିତରେ ଭକ୍ତମାନେ କରୁଥିବା ଶ୍ରାଦ୍ଧ କାର୍ଯ୍ୟରୁ ପୂଜକମାନେ ଅର୍ଥ ଆଦାୟ କରୁଥିବା ଦେଖିବାକୁ ମିଳୁଛି। ଏହି ଅର୍ଥ ଆଦାୟର ହିସାବ କିପରି ରଖାଯାଉଛି, ଏହା ମନ୍ଦିରର ଆୟ ଭାବେ ରେକର୍ଡ ହେଉଛି କି ନାହିଁ ଏବଂ ଏଥିପାଇଁ କୌଣସି ଅଧିକୃତ ବ୍ୟବସ୍ଥା ରହିଛି କି ନାହିଁ—ତାହାକୁ ନେଇ ମଧ୍ୟ ପ୍ରଶ୍ନ ଉଠିଛି।ଗୋଟିଏ ପରେ ଗୋଟିଏ ଘଟଣା ସାମ୍ନାକୁ ଆସୁଥିବାରୁ ମନ୍ଦିରର ପରିଚାଳନା, ସୁରକ୍ଷା ଓ ଆର୍ଥିକ ସ୍ୱଚ୍ଛତାକୁ ନେଇ ଭକ୍ତମାନଙ୍କ ମଧ୍ୟରେ ଆଲୋଚନା ଜୋର ଧରିଛି। ମନ୍ଦିର ଦେବୋତ୍ତର ବିଭାଗ ଅଧୀନରେ ଥିବାରୁ ଏସବୁ ଘଟଣାରେ ବିଭାଗ ପକ୍ଷରୁ ସ୍ପଷ୍ଟ ତଦନ୍ତ କରାଯାଇ ଆବଶ୍ୟକ ପଦକ୍ଷେପ ନିଆଯିବାକୁ ଭକ୍ତମାନେ ଦାବି କରିଛନ୍ତି।‘ତୀର୍ଥକ୍ଷେତ୍ର’ରେ ଖବର ପ୍ରକାଶ ପରେ ହୁଣ୍ଡୀ ପଛ କାନ୍ଥରୁ କ୍ୟୁଆର୍ କୋଡ୍ ହଟିବା ଘଟଣା ଏବେ ଗୁଣପୁର ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି।ଏଥିସହ ଭକ୍ତମାନଙ୍କ ପକ୍ଷରୁ ଦାବି ହୋଇଛି ଯେ, ମନ୍ଦିରର ପ୍ରବେଶ ପଥ ନିକଟ କାନ୍ଥରେ ଦେବୋତ୍ତର ଅଧିକାରୀଙ୍କ ଯୋଗାଯୋଗ ନମ୍ବର ସ୍ପଷ୍ଟ ଭାବେ ପ୍ରଦର୍ଶିତ କରାଯାଉ। ଯାହାଦ୍ୱାରା ମନ୍ଦିର ସମ୍ପର୍କିତ କୌଣସି ଅଭିଯୋଗ, ଦାନ କିମ୍ବା ଅନ୍ୟାନ୍ୟ ସମସ୍ୟା ଥିଲେ ଭକ୍ତମାନେ ସିଧାସଳଖ ଦେବୋତ୍ତର ଅଧିକାରୀଙ୍କ ସହ ଯୋଗାଯୋଗ କରିପାରିବେ। ମନ୍ଦିରର ପରିଚାଳନା, ସ୍ୱଚ୍ଛତା ଓ ଭକ୍ତମାନଙ୍କ ସ୍ୱାର୍ଥ ଦୃଷ୍ଟିରୁ ଏଭଳି ବ୍ୟବସ୍ଥା ଆବଶ୍ୟକ ବୋଲି ବୁଦ୍ଧିଜୀବୀ ମହଲରେ ମଧ୍ୟ ମତପ୍ରକାଶ ପାଇଛି।