ଚାହିଦା ବୃଦ୍ଧି ସମୟରେ ନିରବିଚ୍ଛିନ୍ନ ଇନ୍ଧନ ଯୋଗାଣ ସୁନିଶ୍ଚିତ କରୁଛନ୍ତି ରାଷ୍ଟ୍ରାୟତ୍ତ ତୈଳ ବିପଣନ କମ୍ପାନୀ
ନୂଆଦିଲ୍ଲୀ, ୨୧ ମେ:କେତେକ କ୍ଷେତ୍ରରେ ଇନ୍ଧନ ଚାହିଦାରେ ଅକସ୍ମାତ୍ ଏବଂ ତୀବ୍ର ବୃଦ୍ଧି ମଧ୍ୟରେ ପେଟ୍ରୋଲ, ଡିଜେଲ ଓ ଏଲପିଜିର ନିରନ୍ତର ଉପଲବ୍ଧତା ସୁନିଶ୍ଚିତ କରିବା ପାଇଁ ରାଷ୍ଟ୍ରାୟତ୍ତ କ୍ଷେତ୍ର ତୈଳ ବିପଣନ କମ୍ପାନୀ (ଓଏମସି) – ଇଣ୍ଡିଆନ ଅଏଲ, ବିପିସିଏଲ ଓ ଏଚପିସିଏଲ ସାରା ଦେଶରେ ସମନ୍ୱିତ ପରିଚାଳନା ଏବଂ ଲଜିଷ୍ଟିକ୍ସ ପଦକ୍ଷେପ ଜାରି ରଖିଛନ୍ତି ।ଗତ କିଛିଦିନ ମଧ୍ୟରେ, ଓଏମସିଗୁଡ଼ିକର ପେଟ୍ରୋଲିୟମ ଉତ୍ପାଦ ବିକ୍ରିରେ ଯଥେଷ୍ଟ ବୃଦ୍ଧି ଦେଖିବାକୁ ମିଳିଛି । ଏହାର ମୁଖ୍ୟ କାରଣ ହେଉଛି ଅନେକ ରାଜ୍ୟରେ ଜାରି ରହିଥିବା ମୌସୁମୀଜନିତ କୃଷି ଗତିବିଧି ଏବଂ ଫସଲ ଅମଳ କାର୍ଯ୍ୟ ଜାରି ରହିବା । ସେହିପରି ଅନ୍ୟ ଯୋଗାଣକାରୀଙ୍କ ତୁଳନାରେ କମ୍ ମୂଲ୍ୟ କାରଣରୁ ଅଧିକ ସଂଖ୍ୟାରେ ଖୁଚୁରା ଗ୍ରାହକମାନେ ଉତ୍ପାଦ କିଣିବା ଲାଗି ରାଷ୍ଟ୍ରାୟତ୍ତ କ୍ଷେତ୍ରର ଖୁଚୁରା ବିକ୍ରୟ କେନ୍ଦ୍ରକୁ ଯାଉଛନ୍ତି । ଏଥିସହିତ ସଂସ୍ଥାଗତ ଓ ବାଣିଜ୍ୟିକ ଗ୍ରାହକ ମଧ୍ୟ ଖୁଚୁରା ତୈଳ ବିକ୍ରୟ କେନ୍ଦ୍ରକୁ ଆସିବା ପରେ ଚାହିଦାରେ ଅତିରିକ୍ତ ଚାପ ଦେଖିବାକୁ ମିଳିଛି ।ରାଷ୍ଟ୍ରାୟତ୍ତ କ୍ଷେତ୍ରର ଓଏମସିଗୁଡ଼ିକ ସେମାନଙ୍କର ବ୍ୟାପକ ଦେଶବ୍ୟାପୀ ଟର୍ମିନାଲ, ଡିପୋ, ପାଇପଲାଇନ, ଏଲପିଜି ବଟଲିଂ ପ୍ଲାଣ୍ଟ ଏବଂ ଖୁଚୁରା ଆଉଟଲେଟ୍ ନେଟୱାର୍କ ମାଧ୍ୟମରେ ନିରବଚ୍ଛିନ୍ନ ଯୋଗାଣ ଜାରି ରଖିଛନ୍ତି । ବଜାରରେ ଉତ୍ପାଦ ପରିବହନ ଏବଂ ସମୟାନୁସାରେ ପୁନଃଭରଣା ସୁନିଶ୍ଚିତ କରିବା ପାଇଁ ଯୋଗାଣ ଦଳ, ପରିବହନ ନେଟୱର୍କ, ଟର୍ମିନାଲ ପରିଚାଳନା କାର୍ଯ୍ୟ ସହିତ କିଛି ଖୁଚୁରା ଆଉଟଲେଟ୍ ୨୪ ଘଣ୍ଟିଆ କାର୍ଯ୍ୟ କରୁଛନ୍ତି।ସାରା ଦେଶରେ ପେଟ୍ରୋଲ, ଡିଜେଲ ଏବଂ ଏଲପିଜିର ପର୍ଯ୍ୟାପ୍ତ ଷ୍ଟକ୍ ଉପଲବ୍ଧ ରହିଛି ବୋଲି ତୈଳ ଉଦ୍ୟୋଗ ପକ୍ଷରୁ ଆଶ୍ୱାସନା ଦିଆଯାଇଛି । ସୁଗମ ଏବଂ ନିରବଚ୍ଛିନ୍ନ ଯୋଗାଣ ବଜାୟ ରଖିବା ପାଇଁ ସମସ୍ତ ଆବଶ୍ୟକ ପଦକ୍ଷେପ ନିଆଯାଉଛି ।ବର୍ଦ୍ଧିତ ଚାହିଦା ପରିସ୍ଥିତିକୁ ଦକ୍ଷତାର ସହିତ ପୂରଣ କରିବା ପାଇଁ ରାଷ୍ଟ୍ରାୟତ୍ତ କ୍ଷେତ୍ରର ଓଏମସିଗୁଡ଼ିକ ନିରନ୍ତର ଷ୍ଟକ୍ ସ୍ଥିତି ସମୀକ୍ଷା କରୁଛନ୍ତି ଏବଂ ସମନ୍ୱିତ ଢଙ୍ଗରେ ଲଜିଷ୍ଟିକ୍ସ ଓ ବିତରଣ ଯୋଜନା ପ୍ରସ୍ତୁତ କରୁଛନ୍ତି ।ଅନାବଶ୍ୟକ ଭାବେ ଭୟଭୀତ ହୋଇ କିଣାକିଣି କରିବାରୁ ବିରତ ରହିବା ତଥା ସ୍ୱାଭାବିକ ଭାବେ ଇନ୍ଧନ କିଣିବା ଲାଗି ନାଗରିକମାନଙ୍କୁ ପରାମର୍ଶ ଦିଆଯାଉଛି । ଇନ୍ଧନ ଉପଲବ୍ଧତା ସମ୍ବନ୍ଧୀୟ ସଠିକ୍ ସୂଚନା ପାଇଁ ଗ୍ରାହକମାନଙ୍କୁ କେବଳ ଅଧିକୃତ ଏଜେନ୍ସି ଏବଂ ତୈଳ ବିପଣନ କମ୍ପାନୀଗୁଡ଼ିକ ଦ୍ୱାରା ଜାରି କରାଯାଇଥିବା ସରକାରୀ ଯୋଗାଯୋଗ ଉପରେ ନିର୍ଭର କରିବାକୁ ଅନୁରୋଧ କରାଯାଇଛି ।