ମତ୍ସ୍ୟ ବିଭାଗରେ ଅନିୟମିତତା ଅଭିଯୋଗ: ଆବେଦନ ପୂର୍ବରୁ ପୋଖରୀ ଖନନ, ପରେ ମଞ୍ଜୁରୀ ଓ କାଗଜପତ୍ର

ପୁରୀ, ୨ ସେପ୍ଟେମ୍ବର ୨୦୨୬:* ଆମ୍ ଆଦ୍‌ମୀ ପାର୍ଟି ପକ୍ଷରୁ ଆଜି ଜିଲ୍ଲା କାର୍ଯ୍ୟାଳୟରେ ଏକ ପ୍ରେସ୍ ସମ୍ମିଳନୀ ଆୟୋଜିତ ହୋଇଥିଲା। ଏଥିରେ ମତ୍ସ୍ୟ ବିଭାଗରେ ସରକାରୀ ଯୋଜନାର କାର୍ଯ୍ୟାନ୍ୱୟନ, ଅର୍ଥ ମଞ୍ଜୁରୀ ଏବଂ ବିଭିନ୍ନ ଦଲିଲ ପ୍ରସ୍ତୁତିକୁ ନେଇ ଗୁରୁତର ପ୍ରଶ୍ନ ଉଠାଇଥିଲେ ଆମ୍ ଆଦମୀ ପାର୍ଟିର ଜିଲ୍ଲା ସଭାପତି ଶ୍ରୀ ସଞ୍ଜୀବ କୁମାର ମହାନ୍ତି।ଶ୍ରୀ ମହାନ୍ତି କହିଛନ୍ତି ଯେ, RTI ମାଧ୍ୟମରେ ପ୍ରାପ୍ତ ତଥ୍ୟ ଅନୁଯାୟୀ, ଛାୟାମଣୀ ଗଡୁ ୧୭/୧୨/୨୦୨୨ରେ ପ୍ରଧାନମନ୍ତ୍ରୀ ମତ୍ସ୍ୟ ସମ୍ପଦ ଯୋଜନା ଅଧୀନରେ ମାଛ ଚାଷ ପାଇଁ ଆବେଦନ କରିଥିଲେ। ସେହି ଦିନ, ଅର୍ଥାତ୍ ୧୭/୧୨/୨୦୨୨ରେ ମଧ୍ୟାହ୍ନ ୧୨ଟା ୩୧ ମିନିଟ୍ ସମୟରେ କାର୍ଯ୍ୟରତ ଅଧିକାରୀ ପ୍ରସ୍ତାବିତ ସ୍ଥାନ ପରିଦର୍ଶନ କରିଥିବା ଦର୍ଶାଯାଇଛି।କିନ୍ତୁ ଏଠାରେ ମୁଖ୍ୟ ପ୍ରଶ୍ନ ହେଉଛି—RTI ତଥ୍ୟରେ ପୋଖରୀ ଖନନର ତାରିଖ ୧୩/୦୬/୨୦୨୧ ବୋଲି ଉଲ୍ଲେଖ ରହିଛି। ଅର୍ଥାତ୍, ୨୦୨୨ ମସିହାରେ ଯୋଜନା ପାଇଁ ଆବେଦନ କରାଯିବାର ପୂର୍ବରୁ ହିଁ ପୋଖରୀ ଖନନ ହୋଇଥିବା ତଥ୍ୟ ସାମ୍ନାକୁ ଆସୁଛି। ଯଦି ଆବେଦନ ପୂର୍ବରୁ ପୋଖରୀ ଖନନ ହୋଇଥିଲା, ତେବେ ପରବର୍ତ୍ତୀ ସମୟରେ କେଉଁ ଆଧାରରେ ଏହି କାର୍ଯ୍ୟକୁ ଯୋଜନା ସହିତ ସମ୍ପୃକ୍ତ କରାଗଲା, ତାହା ନେଇ ଶ୍ରୀ ମହାନ୍ତି ପ୍ରଶ୍ନ ଉଠାଇଛନ୍ତି।RTI ତଥ୍ୟ ଅନୁଯାୟୀ, କୃଷ୍ଣପ୍ରସାଦ RI ତହସିଲଦାରଙ୍କ ନିକଟରେ ୧୬/୦୩/୨୦୨୩ରେ ଏକ ରିପୋର୍ଟ ଦାଖଲ କରିଥିଲେ। ପୁନର୍ବାର, ୦୯/୧୨/୨୦୨୫ରେ RI ତହସିଲଦାରଙ୍କ ନିକଟରେ ଆଉ ଏକ ପତ୍ର ଦାଖଲ କରାଯାଇଥିବା ତଥ୍ୟ ମିଳିଛି। ଉକ୍ତ ପତ୍ରର ପତ୍ର ସଂଖ୍ୟା ‘୧’ ରହିଥିବାରୁ ଏହାକୁ ନେଇ ମଧ୍ୟ ଶ୍ରୀ ମହାନ୍ତି ସନ୍ଦେହ ପ୍ରକାଶ କରିଛନ୍ତି।ଏହାପରେ, କୃଷ୍ଣପ୍ରସାଦ ତହସିଲଦାରଙ୍କୁ ୧୮/୧୦/୨୦୨୫ରେ ଲ୍ୟାଣ୍ଡ ରିପୋର୍ଟ ମିଳିଥିବା ବେଳେ, ପୋଖରୀ ସମ୍ବନ୍ଧରେ ତହସିଲଦାରଙ୍କ ପକ୍ଷରୁ RIଙ୍କୁ ୩୧/୧୨/୨୦୨୫ରେ ପତ୍ର ପ୍ରେରଣ କରାଯାଇଥିବା ତଥ୍ୟ ମଧ୍ୟ ରହିଛି।ମଞ୍ଜୁରୀକୁ ନେଇ ମଧ୍ୟ ଉଠିଲା ପ୍ରଶ୍ନଶ୍ରୀ ମହାନ୍ତିଙ୍କ ଅଭିଯୋଗ ଅନୁଯାୟୀ, ମତ୍ସ୍ୟ ବିଭାଗର କମିଟି—ସହକାରୀ ମତ୍ସ୍ୟ ଅଧିକାରୀ, ବ୍ରହ୍ମଗିରି; ସହକାରୀ ମତ୍ସ୍ୟ ଅଧିକାରୀ/DFO, ପୁରୀ; ମତ୍ସ୍ୟ ଅଧିକାରୀ, ପୁରୀ ଏବଂ ଓଡ଼ିଶା ମତ୍ସ୍ୟ ବିଭାଗର ଉପନିର୍ଦ୍ଦେଶକଙ୍କ ସମ୍ପୃକ୍ତତାରେ ପ୍ରସ୍ତାବିତ ସ୍ଥାନ ପରିଦର୍ଶନ କରାଯାଇ ୦୩/୦୬/୨୦୨୨ରେ ୩ ଲକ୍ଷ ୬ ହଜାର ଟଙ୍କା ମଞ୍ଜୁର କରାଯାଇଥିଲା।ଏହି ଅର୍ଥରେ ଛାୟାମଣୀ ଗଡୁ ମହିଳା କୋଟାରେ ୫୦ ପ୍ରତିଶତ ଛାଡ଼ ପାଇଥିବା କୁହାଯାଇଛି।କିନ୍ତୁ ପୋଖରୀ ଖନନର ତାରିଖ ୧୩/୦୬/୨୦୨୧ ହୋଇଥିବା ବେଳେ, ଯୋଜନା ଅଧୀନରେ ଆବେଦନ, ସ୍ଥଳ ପରିଦର୍ଶନ, ଅର୍ଥ ମଞ୍ଜୁରୀ ଏବଂ ପରବର୍ତ୍ତୀ ଦଲିଲ ପ୍ରକ୍ରିୟା କିପରି ସମ୍ପନ୍ନ ହେଲା—ଏହା ଏକ ଗୁରୁତର ପ୍ରଶ୍ନ ବୋଲି ଶ୍ରୀ ମହାନ୍ତି କହିଛନ୍ତି।ଆବେଦନ ପୂର୍ବରୁ ପୋଖରୀ ଖନନ ହୋଇଥିଲେ, ସରକାରୀ ଯୋଜନାର ନିୟମ ଅନୁଯାୟୀ ଏହା କିପରି ଯୋଗ୍ୟ ବିବେଚିତ ହେଲା? ଏହି ପ୍ରଶ୍ନର ସ୍ପଷ୍ଟ ଉତ୍ତର ଜିଲ୍ଲା ପ୍ରଶାସନ ଏବଂ ମତ୍ସ୍ୟ ବିଭାଗ ଦେବା ଆବଶ୍ୟକ ବୋଲି ସେ ଦାବି କରିଛନ୍ତି।DFO କାର୍ଯ୍ୟାଳୟରେ ‘ଦାନ’ କରାଯାଇଥିବା ACକୁ ନେଇ ମଧ୍ୟ ପ୍ରଶ୍ନପ୍ରେସ୍ ସମ୍ମିଳନୀରେ ମତ୍ସ୍ୟ ବିଭାଗର DFO କାର୍ଯ୍ୟାଳୟରେ ସ୍ଥାପିତ ଏକ ACକୁ ନେଇ ମଧ୍ୟ ଶ୍ରୀ ମହାନ୍ତି ପ୍ରଶ୍ନ ଉଠାଇଛନ୍ତି।ତାଙ୍କ କହିବା ଅନୁଯାୟୀ, ଉକ୍ତ AC ଉପରେ ‘Bank Donated’ ବୋଲି ଲେଖାଯାଇଥିବା ବେଳେ, ଏହା ଜଣେ ସାଧାରଣ ବ୍ୟକ୍ତିଙ୍କ ନାମରେ କିଣାଯାଇଥିବା ତଥ୍ୟ ରହିଛି। ଯଦି ACଟି ଜଣେ ବ୍ୟକ୍ତିଙ୍କ ନାମରେ କିଣାଯାଇଛି, ତେବେ ଏହା ଉପରେ ‘Bank Donated’ କାହିଁକି ଲେଖାଯାଇଛି ଏବଂ କେଉଁ ଆଧାରରେ ଏହି ACକୁ ମତ୍ସ୍ୟ ବିଭାଗ କାର୍ଯ୍ୟାଳୟକୁ ଦିଆଯାଇଛି—ତାହାର ତଦନ୍ତ ହେବା ଆବଶ୍ୟକ।ସୂଚନା ଅନୁଯାୟୀ, ସମ୍ପୃକ୍ତ ବ୍ୟକ୍ତି ମତ୍ସ୍ୟ ବିଭାଗରୁ ମାଛ ପରିବହନ ଗାଡ଼ି, ପୋଖରୀ ଏବଂ ଅନ୍ୟାନ୍ୟ ସୁବିଧା ପାଇଥିବା ଦାବି ମଧ୍ୟ ଶ୍ରୀ ମହାନ୍ତି କରିଛନ୍ତି। ତେଣୁ AC ଦାନ ଏବଂ ବିଭାଗରୁ ମିଳିଥିବା ବିଭିନ୍ନ ସୁବିଧା ମଧ୍ୟରେ କୌଣସି ସମ୍ପର୍କ ରହିଛି କି ନାହିଁ, ତାହାର ନିରପେକ୍ଷ ତଦନ୍ତ ଦାବି କରାଯାଇଛି।ନିରପେକ୍ଷ ତଦନ୍ତ ଦାବିଆମ୍ ଆଦମୀ ପାର୍ଟିର ଜିଲ୍ଲା ସଭାପତି ଶ୍ରୀ ସଞ୍ଜୀବ କୁମାର ମହାନ୍ତି କହିଛନ୍ତି ଯେ, RTI ମାଧ୍ୟମରେ ପ୍ରାପ୍ତ ତଥ୍ୟଗୁଡ଼ିକ ଅନେକ ଗୁରୁତର ପ୍ରଶ୍ନ ସୃଷ୍ଟି କରୁଛି। ତେଣୁ ଏହି ସମଗ୍ର ଘଟଣାର ଏକ ନିରପେକ୍ଷ ଓ ଉଚ୍ଚସ୍ତରୀୟ ତଦନ୍ତ କରାଯାଇ ସତ୍ୟାସତ୍ୟ ସାମ୍ନାକୁ ଆଣିବା ସହିତ, ଯଦି କୌଣସି ଅଧିକାରୀ କିମ୍ବା ବ୍ୟକ୍ତି ନିୟମ ଉଲ୍ଲଂଘନ କରିଥିବା ପ୍ରମାଣିତ ହୁଅନ୍ତି, ତେବେ ତାଙ୍କ ବିରୋଧରେ ଆଇନ ଅନୁଯାୟୀ ତୁରନ୍ତ କାର୍ଯ୍ୟାନୁଷ୍ଠାନ ନିଆଯାଉ।ସରକାରୀ ଯୋଜନାର ଅର୍ଥ ସାଧାରଣ ଲୋକଙ୍କ ଟଙ୍କା। ଏହାର ବ୍ୟବହାରରେ ସ୍ୱଚ୍ଛତା, ଜବାବଦେହିତା ଓ ନିୟମ ପାଳନ ନିଶ୍ଚିତ କରିବା ସରକାରଙ୍କ ଦାୟିତ୍ୱ। ତେଣୁ ଗତ ୪ ବର୍ଷ ଭିତରେ ଜିଲ୍ଲାରେ ସରକାରୀ ଅନୁଦାନରେ କେତେ ପୋଖରୀ ଖୋଳା ଯାଇଛି , କେତେ ଟଙ୍କା ମଞ୍ଜୁର ହୋଇଛି ତାହାର ଜିଲ୍ଲାପାଳ କମିଟି ଗଠନ କରି ତଦନ୍ତ କରନ୍ତୁ ।ଉପରୋକ୍ତ ସମସ୍ତ ଘଟଣାର ତଦନ୍ତ କରି ସତ୍ୟ ସାମ୍ନାକୁ ଆଣିବାକୁ ଆମ୍ ଆଦ୍‌ମୀ ପାର୍ଟି ଦାବି କରିଛି।ଆଜିର ପ୍ରେସ କନଫରେନ୍ସ ରେ ଜିଲ୍ଲା ସଭାପତି ଶ୍ରୀଯୁକ୍ତ ସଞ୍ଜୀବ କୁମାର ମହାନ୍ତି, ନଗର ସଭାପତି ଶ୍ରୀଯୁକ୍ତ ରମାକାନ୍ତ ସ୍ୱାଇଁ ଏବଂ ତପନ କୁମାର ରାଏ ଉପସ୍ଥିତ ଥିଲେ।