ମୋବାଇଲ୍ ବ୍ୟବହାର କରି ଗାଡ଼ି ଚାଳନା ବିରୋଧରେ ପୁରୀ ପୋଲିସର ସ୍ୱତନ୍ତ୍ର ସଚେତନତା ଓ ଯାଞ୍ଚ ଅଭିଯାନ

ମୋବାଇଲ୍ ବ୍ୟବହାର କରି ଗାଡ଼ି ଚାଳନା ବିରୋଧରେ ପୁରୀ ପୋଲିସର ସ୍ୱତନ୍ତ୍ର ସଚେତନତା ଓ ଯାଞ୍ଚ ଅଭିଯାନ*ସଡ଼କ ସୁରକ୍ଷାକୁ ସର୍ବୋଚ୍ଚ ପ୍ରାଥମିକତା ଦେଇ ପୁରୀ ପୋଲିସ ସିଟି ସବଡିଭିଜନ ପକ୍ଷରୁ ଆଜି ସହରର ବିଭିନ୍ନ ପ୍ରମୁଖ ସ୍ଥାନରେ ମୋବାଇଲ୍ ଫୋନ୍ ବ୍ୟବହାର କରି ଗାଡ଼ି ଚଳାଉଥିବା ଚାଳକଙ୍କ ବିରୋଧରେ ଏକ ସ୍ୱତନ୍ତ୍ର ଯାଞ୍ଚ ଓ ସଚେତନତା ଅଭିଯାନ ଚାଲିଥିଲା। ଏହି ଅଭିଯାନର ମୂଳ ଉଦ୍ଦେଶ୍ୟ ଥିଲା ସଡ଼କ ଦୁର୍ଘଟଣାକୁ ରୋକିବା, ଦାୟିତ୍ୱବାନ ଯାନ ଚାଳନାକୁ ପ୍ରୋତ୍ସାହିତ କରିବା ଏବଂ ଜନସାଧାରଣଙ୍କ ମଧ୍ୟରେ ସଡ଼କ ସୁରକ୍ଷା ପ୍ରତି ସଚେତନତା ବୃଦ୍ଧି କରିବା।ଅଭିଯାନ ସମୟରେ ପୋଲିସ ଟିମ୍ ବିଭିନ୍ନ ଗୁରୁତ୍ୱପୂର୍ଣ୍ଣ ରାସ୍ତା ଓ ଛକରେ ଯାଞ୍ଚ କରିଥିଲେ। ଏହି ସମୟରେ ମୋବାଇଲ୍ ଫୋନ୍ ବ୍ୟବହାର କରି ଗାଡ଼ି ଚଳାଉଥିବା ମୋଟ ୨୦ ଜଣ ଚାଳକଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ।କୁମ୍ଭାରପଡ଼ା ଥାନା ୭ଟି ଗାଡ଼ି, ବଳିଆପଣ୍ଡା ଥାନା ୬ଟି ଗାଡ଼ି, ସି-ବିଚ୍ ଥାନା ୪ଟି ଗାଡ଼ି ଓ ଟାଉନ ଥାନା ୩ଟି ଗାଡ଼ି। ଯାଞ୍ଚ ସହିତ ସଚେତନତାକୁ ମଧ୍ୟ ସମାନ ଗୁରୁତ୍ୱ ଦିଆଯାଇଥିଲା। ଡ୍ୟୁଟିରେ ନିୟୋଜିତ ପୋଲିସ ଅଧିକାରୀ ଓ କର୍ମଚାରୀମାନେ ଚାଳକମାନଙ୍କୁ ମୋବାଇଲ୍ ବ୍ୟବହାର କରି ଗାଡ଼ି ଚଳାଇବାର ବିପଦ ସମ୍ପର୍କରେ ବିସ୍ତୃତ ଭାବେ ବୁଝାଇଥିଲେ। ସେମାନଙ୍କୁ କୁହାଯାଇଥିଲା ଯେ, ଗାଡ଼ି ଚଳାଇବା ସମୟରେ ମୋବାଇଲ୍ ଫୋନ୍ ବ୍ୟବହାର କଲେ ମାତ୍ର କିଛି ସେକେଣ୍ଡ ପାଇଁ ଧ୍ୟାନ ବିଚ୍ୟୁତ ହେବା ମଧ୍ୟ ଏକ ବଡ଼ ଦୁର୍ଘଟଣାର କାରଣ ହୋଇପାରେ। ଚାଳକମାନଙ୍କୁ ପରାମର୍ଶ ଦିଆଯାଇଥିଲା ଯେ, ଯଦି କୌଣସି ଜରୁରୀ କଲ୍ ଗ୍ରହଣ କରିବା କିମ୍ବା ମୋବାଇଲ୍ ବ୍ୟବହାର କରିବାର ଆବଶ୍ୟକତା ପଡ଼େ, ତେବେ ପ୍ରଥମେ ଗାଡ଼ିକୁ ସୁରକ୍ଷିତ ସ୍ଥାନରେ ଅଟକାଇ ତା’ପରେ ମୋବାଇଲ୍ ବ୍ୟବହାର କରନ୍ତୁ।

ଚଳନ୍ତା ଗାଡ଼ିରେ ମୋବାଇଲ୍ ବ୍ୟବହାର କରିବା ଦ୍ୱାରା କେବଳ ନିଜ ଜୀବନ ନୁହେଁ, ଅନ୍ୟ ଯାନ ଚାଳକ, ପଥଚାରୀ ଓ ସହଯାତ୍ରୀଙ୍କ ଜୀବନ ମଧ୍ୟ ବିପଦରେ ପଡ଼ିପାରେ। ସଡ଼କ ଦୁର୍ଘଟଣାର ଏକ ପ୍ରମୁଖ କାରଣ ହେଉଛି ଚାଳକଙ୍କ ଅସାବଧାନତା। ବିଶେଷକରି ମୋବାଇଲ୍ ଫୋନ୍‌ରେ କଥାବାର୍ତ୍ତା, ମେସେଜ୍ ପଢ଼ିବା କିମ୍ବା ଟାଇପ୍ କରିବା, ସୋସିଆଲ୍ ମିଡିଆ ବ୍ୟବହାର କରିବା ଓ ଭିଡିଓ ଦେଖିବା ଭଳି କାର୍ଯ୍ୟକଳାପ ଚାଳକଙ୍କ ଧ୍ୟାନକୁ ସଡ଼କରୁ ହଟାଇଦିଏ, ଯାହା ଅନେକ ସମୟରେ ଗୁରୁତର ଦୁର୍ଘଟଣାର ରୂପ ନେଇଥାଏ। ପୁରୀ ପୋଲିସ ପକ୍ଷରୁ ସମସ୍ତ ଯାନ ଚାଳକଙ୍କୁ ଅନୁରୋଧ କରାଯାଉଛି ଯେ, ଟ୍ରାଫିକ୍ ନିୟମକୁ ସମ୍ମାନ କରନ୍ତୁ, ଗାଡ଼ି ଚଳାଇବା ସମୟରେ ମୋବାଇଲ୍ ବ୍ୟବହାରରୁ ବିରତ ରୁହନ୍ତୁ, ହେଲମେଟ୍ ଓ ସିଟ୍ ବେଲ୍ଟ ବ୍ୟବହାର କରନ୍ତୁ, ନିର୍ଦ୍ଧାରିତ ବେଗ ସୀମା ମାନନ୍ତୁ ଏବଂ ସମସ୍ତ ଟ୍ରାଫିକ୍ ନିୟମ ପାଳନ କରନ୍ତୁ। ପୁରୀ ପୋଲିସ ସ୍ପଷ୍ଟ କରିଛି ଯେ, ଜନସାଧାରଣଙ୍କ ସୁରକ୍ଷାକୁ ଦୃଷ୍ଟିରେ ରଖି ଏଭଳି ସ୍ୱତନ୍ତ୍ର ଯାଞ୍ଚ ଓ ସଚେତନତା ଅଭିଯାନ ଆଗାମୀ ଦିନରେ ମଧ୍ୟ ନିୟମିତ ଭାବେ ଜାରି ରହିବ। ସଡ଼କ ସୁରକ୍ଷା କେବଳ ପୋଲିସର ଦାୟିତ୍ୱ ନୁହେଁ, ବରଂ ପ୍ରତ୍ୟେକ ନାଗରିକଙ୍କ ସମ୍ମିଳିତ ଦାୟିତ୍ୱ। ସମସ୍ତଙ୍କ ସହଯୋଗରେ ହିଁ ଏକ ସୁରକ୍ଷିତ, ଶୃଙ୍ଖଳିତ ଓ ଦୁର୍ଘଟଣାମୁକ୍ତ ପୁରୀ ଗଢ଼ି ତୋଳା ସମ୍ଭବ। ପୁରୀ ପୋଲିସ ସମସ୍ତ ନାଗରିକଙ୍କୁ ନିବେଦନ କରୁଛି “ଗାଡ଼ି ଚଳାଇବା ସମୟରେ ମୋବାଇଲ୍ ନୁହେଁ, ସଡ଼କ ଉପରେ ଧ୍ୟାନ ଦିଅନ୍ତୁ। ଆପଣଙ୍କ ସତର୍କତା ଆପଣଙ୍କ ଏବଂ ଅନ୍ୟମାନଙ୍କ ଜୀବନକୁ ସୁରକ୍ଷିତ ରଖିପାରିବ।”