ଶିବଙ୍କର ଅର୍ଦ୍ଧନାରୀଶ୍ବର ରୂପ
ଶିବଙ୍କର ଅର୍ଦ୍ଧନାରୀଶ୍ବର ରୂପ
( ରାଗ — ଚିନ୍ତାଦେଶାକ୍ଷ )
🔹କବିରତ୍ନ ନୂତନ କୁମାର ବେହେରା
ଦେବ ଦେବ ମହାଦେବ’ ଶିବ ଶଙ୍କର’
ଆଶୁତୋଷ ଭୋଳାନାଥ, ସେ ମହେଶ୍ୱର’ ।
ଜଗତ କଲ୍ୟାଣେ ସଦା ସେ ସଦାଶିବ,
ଭାବେ ଭବରୁ ଘୁଞ୍ଚାନ୍ତି ଯେତେ ଅଭାବ ।
ବିଷ୍ଣୁଙ୍କ ଆଜ୍ଞାରେ ବ୍ରହ୍ମା କଲେ ସର୍ଜନା,
ବିଶ୍ଵ ବ୍ରହ୍ମାଣ୍ଡର କରି ନବ କଳ୍ପନା ।
ପଶୁପକ୍ଷୀ ତରୁଲତା କୀଟ ପତଙ୍ଗ,
ଜୀବନ ସାଥେ ଦେଲେ ଯେ ସ୍ଵତନ୍ତ୍ର ଅଙ୍ଗ ।
ସୃଷ୍ଟି ବିକାଶେ ନଥିଲା କିଛି ମାଧ୍ୟମ,
କ୍ରମ ବର୍ଦ୍ଧନେ ଥିଲା ଯେ ହୋଇ ସସୀମ ।
ଦେଖି ଏହା ବ୍ରହ୍ମଦେବ କରିଲେ ଚିନ୍ତା,
କେମନ୍ତେ ସୃଷ୍ଟିର ଧାରା ଚିର ରୁହନ୍ତା !
ଏ ବାରତା ଜଣାଇଲେ ବିଷ୍ଣୁଙ୍କୁ ଯାଇ,
ସେ ଶୁଣି ସବୁ ଉପାୟ ଦେଲେ ବତାଇ ।
ଶିବ ଶଙ୍କରଙ୍କୁ କର ହେ ଆରାଧନା,
ଘୁଞ୍ଚାଇବେ ସମସ୍ୟା ସେ କରି ଯୋଜନା ।
ତହୁଁ ବ୍ରହ୍ମା ଶଙ୍କରଙ୍କୁ କଲେ ତପସ୍ୟା,
ପ୍ରକଟିତେ ଦୂରାଇଲେ ଏଇ ସମସ୍ୟା ।
ଅର୍ଦ୍ଧନାରୀଶ୍ବର ରୂପ କରି ଧାରଣ,
ଗୁଢ଼ ରହସ୍ୟ ତାହାର କଲେ ବର୍ଣ୍ଣନ ।
ଦୁଇ କାୟା ଏକ ଆତ୍ମା ନାରୀ ପୁରୁଷ,
ମିଳନେ ସୃଷ୍ଟିର ହେବ କ୍ରମ ବିକାଶ ।
ଅର୍ଦ୍ଧ ଅର୍ଦ୍ଧ ଅଙ୍ଗେ ପୂରା ଏକ ଶରୀର,
ପୃଥକେ ନାରୀ ପୁରୁଷ ତାଙ୍କ ଆକାର ।
ଅର୍ଦ୍ଧନାରୀଶ୍ବରରୁ ସେ ହୋଇ ପୃଥକ,
ନର ନାରୀ ସମ୍ପର୍କକୁ କଲେ ବ୍ୟାପକ ।
ଦକ୍ଷଣି ଅଙ୍ଗ ପୁରୁଷ ବାମ ଯେ ନାରୀ,
ଏକରୁ ଦୁଇ ହୋଇଲେ ଶଙ୍କର ଗୌରୀ ।
ନାରୀର ରୂପ ନ ଚିନ୍ତି ଥିବାରୁ ବ୍ରହ୍ମା,
ମହାଦେବ ଦେଖାଇଲେ ତାଙ୍କ ମହିମା ।
ବିଧି ହୁଏ ସିଦ୍ଧ ନର ନାରୀ ମିଳନେ,
କାମନା ପୂର୍ଣ୍ଣ କରନ୍ତି ତାଙ୍କ ଜୀବନେ ।
ଏ ଭାବେ ସୃଷ୍ଟିର ଚାଲେ କ୍ରମଧାରା,
ନାରୀ ପୁରୁଷର ପ୍ରେମେ ତିଷ୍ଠିଛି ଧରା ।
ଏକ ପୁରୁଷ ସହିତ ଯେ ଏକ ନାରୀ,
ପବିତ୍ର ବନ୍ଧନେ ରହି ଯାଆନ୍ତି ତରି ।
ଏକରୁ ହେଲେ ଅଧିକ ଲାଗେ କଳଙ୍କ,
ଅସମାହିତ ରହେ ସେ ଜୀବନ ଅଙ୍କ ।
ସଂସାରେ ନାରୀ ପୁରୁଷ ଦୁହେଁ ସମାନ,
ଏକ ବିନା ଆନ ରହେ ଯେ ଅସଂପୂର୍ଣ୍ଣ ।
ଅର୍ଦ୍ଧନାରୀଶ୍ବର ରୂପେ ଶିବ ଶଙ୍କର,
ତତ୍ତ୍ଵଜ୍ଞାନକୁ ସଂସାରେ କଲେ ସାକାର ।
ରଖିଲେ ସମତା ଭାବ ହୁଏ ମଙ୍ଗଳ,
ଅନ୍ୟଥାରେ ସଂହାରନ୍ତି ହୋଇ ସେ କାଳ ।
ଜୟ ଜୟ ପ୍ରଭୁ ଆହେ ଉମାଶଙ୍କର,
ତବ ଶୁଭ ଦୃଷ୍ଟି ରହୁ ସକଳେ ଚିର ।
ତବ ପଦାରବିନ୍ଦରେ ରହୁ ଭକତି,
ସତ୍ୟ ପଥେ ନିଅ ସଦା କରେ ମିନତି ।
ପ୍ରତିଷ୍ଠାତା ଓ ମୁଖ୍ୟସମ୍ପାଦକ,
ନବସୃଜନ ଇ-ପତ୍ରିକା,
କୋହି,ବାରିପଦା,ମୟୂରଭଞ୍ଜ।