ମାଗୁଛି ଏତିକି ହେ ଜଗତ ପତି
ମାଗୁଛି ଏତିକି ହେ ଜଗତ ପତି
( ରାଗ — କଳହଂସ କେଦାର )
🔹କବିରତ୍ନ ନୂତନ କୁମାର ବେହେରା
ମାଗୁଛି ଏତିକି ହେ’ ଜଗତ ପତି’
ହୋଇବ ଦୟାବାନ’ କରେ ମିନତି’ ଯେ,
ତୁମ ଇଙ୍ଗିତେ ଚାଲେ’ ସାରା ନିୟତି’
ତୁମ କୃପାରେ ରହେ ‘ ଜୀବର ସ୍ଥିତି’ ଯେ’/୧/
ତୁମରି ବ୍ୟାପ୍ତି ଖ୍ୟାତି ବିଶ୍ବ ବ୍ରହ୍ମାଣ୍ଡେ
ତୁମେ ହିଁ ତ ଚେତନା ଜୀବର ଭାଣ୍ଡେ ଯେ,
ପାଇଅଛି ଯେତିକି ତୁମରି ଦାନ
ତାହାରି ବିନିଯୋଗେ ଜୀଏଁ ଜୀବନ ଯେ/୨/
ହୃଦୟର ଭାବରେ ଚାଲଇ ମନ,
ଅନୁଭବ କରେ ଯା’ ହୁଏ ତା’ ଜ୍ଞାନ ଯେ,
ଇଚ୍ଛାରେ କରି ଶ୍ରମ ଅରଜେ ଧନ,
ସମାଜେ କରି ହିତ ପାଏ ସମ୍ମାନ ସେ/୩/
ହୃଦୟକୁ ପବିତ୍ର କର ହେ ନାଥ,
ଚାଲିବାକୁ ଦେଖାଅ ସତ୍ୟର ପଥ ଯେ,
ମନ ନ ହେଉ କେବେ ଇନ୍ଦ୍ରିୟେ ବଶ
ଲୋଭ ମୋହ ମାୟାର କର ବିନାଶ ଯେ/୪/
ଏ ମନରେ ନ ରହୁ ଛନ୍ଦ କପଟ
ବୁଦ୍ଧି ବିଦ୍ୟା ଜ୍ଞାନରେ ହେଉ ସଚ୍ଚୋଟ ସେ,
ସବୁରି ହିତେ ରହୁ ତୁମକୁ ଧ୍ୟାୟି
ତୁମ ଚରଣ ତଳେ ହୋଇ ଆଶ୍ରୟୀ ଯେ/୫/
ଛଳନା ପ୍ରତାରଣା ନ ଦେଉ ଧୋକା
ସ୍ଵଚ୍ଛ ଚିନ୍ତନେ ମନ ପାଉ ମଉକା ଯେ,
ଶ୍ରମ ସାଧନ କରି ପାଳୁ ଜୀବିକା
ପାଖରେ ରୁହ ସଦା ନ କର ଏକା ଯେ/୬/
ତୁମେ ହିଁ ତ କରତା କରାଅ କର୍ମ
ତୁମରି ଇଛା ହେଉ ପରମ ଧର୍ମ ଯେ,
ତୁମେ ମୋ ଗତି ସ୍ଥିତି ମୁଁ ମୂଢ଼ମତି
ନମ୍ର ବିନୟେ କରେ ତୁମକୁ ସ୍ତୁତି ଯେ/୭/
ପ୍ରତିଷ୍ଠାତା ଓ ମୁଖ୍ୟସମ୍ପାଦକ,
‘ ନବସୃଜନ ‘ ଇ-ପତ୍ରିକା,
କୋହି,ବାରିପଦା,ମୟୂରଭଞ୍ଜ।