କାମ ଅର୍ଥ ଧର୍ମ ମୋକ୍ଷ

                କାମ ଅର୍ଥ ଧର୍ମ ମୋକ୍ଷ
              ( ରାଗ – ଚିନ୍ତାଦେଶାକ୍ଷ )

  🔹କବିରତ୍ନ ନୂତନ କୁମାର ବେହେରା

                   କାମ ( କାମନା )

ଇନ୍ଦ୍ରିୟ ବଶରେ ମନ’ ରଖି ଲାଳସା’
         ସୁଖ ଉପଭୋଗ ଲାଗି’ ବଢ଼ାଏ ଆଶା’ ।
ପ୍ରାଣର ସୁରକ୍ଷା ଭୁଲି ହୁଏ ବିହ୍ବଳ,
            ପରିଣାମ ଚିନ୍ତେ ନାହିଁ ରହେ ଚଞ୍ଚଳ ।
ଆବଶ୍ୟକତାରୁ ବେଶି କଇଇ ଇଚ୍ଛା ,
     ଛାଡ଼େନାହିଁ କେବେ ହେଲେ ସ୍ଵାର୍ଥର ପିଛା ।
କାମିନୀ କାଞ୍ଚନେ ସଦା ବଳାଏ ମନ,
            ଆଗ ପଛକୁ ବିଚାରି ରଖେନା ଧ୍ୟାନ ।
ଏଇ ତ ଅଟେ କାମନା ନାହିଁ ତା’ ଶେଷ,
        ଜୀବନ ଯାକର ଶ୍ରମେ ପାଏନା ତୋଷ ।

                 ଅର୍ଥ ( ଧନ ସମ୍ପତ୍ତି )

ସଂସାରେ ବଞ୍ଚିବା ପାଇଁ ଲୋଡ଼ା ଯେ ଅର୍ଥ,
           ତାର ବିହୁନେ ଜୀବନ ହୁଇଇ ବ୍ୟର୍ଥ ।
ନିଷ୍ଠାପର ଭାବେ କରି ଧନ ଅର୍ଜନ,
              କରିଥାଏ ପରିବାର ପ୍ରତିପୋଷଣ ।
ବ୍ୟତିରେକେ ହୁଏ ଯେତେ ସବୁ ଅନର୍ଥ,
             ତାହାର ମୂଳ କାରଣ ଅଟଇ ସ୍ଵାର୍ଥ ।
ଅର୍ଥର ସୁବିନିଯୋଗେ ହୁଏ ଯେ ଉନ୍ନତି,
            ବଦଖର୍ଚ୍ଚ କରୁଥିଲେ ବଢ଼ଇ ଦୁର୍ଗତି ।
ଅର୍ଥର ମୂଲ୍ୟକୁ ବୁଝି କରେ ଯେ ବ୍ୟୟ,
        ସମାଜେ ତା’ ସ୍ଥିତି ରହେ ହୁଏନା କ୍ଷୟ ।

                      ଧର୍ମ

କର୍ମର ଧାରଣେ ଧର୍ମ ପାଳିଲେ ପୁଣ୍ୟ
           ପ୍ରଭୁ ଭକ୍ତିରେ ମାନବ ହୁଅଇ ଧନ୍ୟ ।
ସତ୍ୟ ସଂରକ୍ଷଣେ ମାୟା ମିଛକୁ ନାଶି
        ଆତ୍ମାର ଉଦ୍ଧାର ଲାଗି ଥାଏ ପ୍ରୟାସୀ ।
ଏକ ବ୍ରହ୍ମ ସାରା ବିଶ୍ଵେ ରହିଛି ପୂରି,
          ତାର ଜ୍ଞାନ ଅନୁଭବେ ରଖଇ ଶିରୀ ।
ଭେଦାଭେଦ ଅହଙ୍କାର ନ ରଖି ମନେ
       ସାତ୍ତ୍ୱିକ ଭାବରେ ରହେ ସୂକ୍ଷ୍ମ ଦର୍ଶନେ ।
ଧର୍ମର ମାର୍ଗେ ସଦ୍ଦିଚ୍ଛା କରେ ପୂରଣ,
       ଅର୍ଥର ନ ହୋଇ ଦାସ ରହେ ସ୍ଵାଧୀନ ।

                        ମୋକ୍ଷ

ମୋହ ହୁଏ ଯେବେ କ୍ଷୟ ମିଳଇ ମୋକ୍ଷ,
          ଆତ୍ମଜ୍ଞାନ ଲଭି ଜଣେ ହୁଏ ସୁଦକ୍ଷ ।
ସବୁରି କଲ୍ୟାଣେ ରହି କରେନା ପାପ,
    ଆସେନା ମୃତ୍ୟୁର ଭୟ ଦେଖେ ସ୍ବରୂପ ।
ଆସକ୍ତି ଆସେନା ଆଉ ଆତ୍ମାକୁ ଜାଣି,
    ସାଧନାର ସିଦ୍ଧିରେ କହେ ଅମୃତ ବାଣୀ ।
ଅନ୍ତର୍ମୁଖୀ ହୋଇ ଧ୍ୟାନେ ରହେ ମଗନ,
      ଲୋଭରେ ପଡ଼େନା ସିଏ ହୁଏ ନିର୍ବିଘ୍ନ ।
ନିର୍ବିକାର ନିରାମୟ ଏ ପରମାର୍ଥ,
         ମାନବ ଜନ୍ମକୁ କରିଥାଏ ଯଥାର୍ଥ ।

  ପ୍ରତିଷ୍ଠାତା ଓ ମୁଖ୍ୟସମ୍ପାଦକ,
‘ ନବସୃଜନ ‘ ଇ-ପତ୍ରିକା,
କୋହି, ବାରିପଦା, ମୟୂରଭଞ୍ଜ।