ରକ୍ତର ରାତିରୁ ଶାନ୍ତିର ପ୍ରଭାତ
ରକ୍ତର ରାତିରୁ ଶାନ୍ତିର ପ୍ରଭାତ
ଡ. ପ୍ରେମାନନ୍ଦ ବେହେରା
ଧୂସର ଆକାଶରେ ରକ୍ତର ଅକ୍ଷର
ପବନରେ ଗୁଳିର ଅର୍ଥହୀନ ଗାଥା
ମାଟି ମଧ୍ୟ କାନ୍ଦେ ନିରବ ସ୍ୱରରେ
ଏହା କି ମନୁଷ୍ୟର ସଭ୍ୟତା ?
ଯୁଦ୍ଧ ଆସେ ଅହଂକାରର ରଥେ
ଅହଙ୍କାରର ଦୀପ ଜାଳି ରାତି ମଧ୍ୟରେ
ମନୁଷ୍ୟ ହୁଏ ଛାୟା ମାତ୍ର
ନିଜ ପରିଚୟକୁ ହରାଇଯାଏ ।।
ମାଁର ଆଖିରେ ଅପେକ୍ଷାର ନଦୀ
ଶିଶୁର ସ୍ୱପ୍ନ ଭଙ୍ଗେ ରଣଭୂମିରେ
ଯେଉଁଠାରେ ଜୀବନର ଗୀତ ଥିଲା
ସେଠି ମୃତ୍ୟୁର ସ୍ୱର ଗୁଞ୍ଜିଉଠେ ।।
କିନ୍ତୁ….
ଦୂରେ କେଉଁଠି ଜଳେ ଶାନ୍ତିର ପ୍ରଦୀପ
ଶିଶୁଟିଏ ହସେ ନୂଆ ପ୍ରଭାତରେ
ପ୍ରେମର ହାତ ବଢ଼େ ଅନ୍ଧକାର ଭିତରୁ
ଆଲୋକ ଖୋଜେ ନିଜର ପଥ ।।
ଶାନ୍ତି ନୁହେଁ ମାତ୍ର ଯୁଦ୍ଧର ଅଭାବ
ଏହା ମନରେ ଏକ ନୀଳ ଆକାଶ
ଯେଉଁଠାରେ ମାନବତା ଜାଗେ
ସୀମାହୀନ ଦୟାର ସୁଗନ୍ଧରେ ।।
ଆସ…..
ଆମେ ଲେଖିବା ନୂତନ ଇତିହାସ
ଯେଉଁଠାରେ ଗୁଳି ନୁହେଁ, ଗୀତ ଗୁଞ୍ଜିବ
ଯେଉଁଠାରେ ରକ୍ତ ନୁହେଁ, ପ୍ରେମ ବହିବ
ଏହି ପୃଥିବୀ ହେବ ଶାନ୍ତିର ନିବାସ ।।
ପଦ୍ମପୁର, ବରଗଡ